a manalita, Kastilan Peninsular insan nadadayew tan mamaongen dan amin.' Oniay ginawak tan sayan balitadon abogado so nanbenben ed asunto nen amá yo, ya anggapoy balbalawen ed impangikurang to. Agay la balet so karakel na kakábusol, maamot tan ag irá kabat so arum. Manlesa ray tasin paklap tan pinapanday, tan saray dakel a pauges da ya no diad arum iran pasen komon et diad sakey onó pigara labat a salitan nantarok na balaw tan panlemlemew na abogadon mangikukorang et nabuybuyak lara, diad sikatayo napabaleg irá tan magmaliw iran singa tugtuwa. No samay inalak ya abogado et nabuybuyak ton naerep iraman a paklap a pauges nisengeg ed pansusumlangan tan pansosoniyay paliwawa ray tási, nitan lara lamet so balon dalém. Indalem dan nansasamsam na akamayamay a daldalin; kinerewan dan manbayar na impakaderal tan impakalames ton kuan a tatawagen ed juzgado na daños y perjuicios, inbagá ran mitatalusan ed saray tutulisan ta piano agda deralen tan diwiten iray pagey to tan arum niran tantanaman tan ayayep to. Asumpalan to diad masiadon inkagotgot na asunto, kayari sakey taon anggapo lay makapantatalusan. Samay alcalde nialís; sinmalat so sakey a bantog a maptek so panagnunot to, balet ta agay met lan kapalaran a pigpigay bulan to dia, tan say sinmoblay ontan lay liket tod maong iran kabayo."
"Saray erermen, irirap na linawa, say andi kainawaan a bilay ed pangawan onó impanlikna to lági impakanengneng toy ontan lan karakel na malamang, dineral day anta mabisbiskeg ya laman nen amá yo, tan asakitan nimay sakit a bukor na lubok sa makatambal. Tan nen nasumpal la komon ya amin a manalo la, ya pinmaway lan aliwa manayan kabusol na bansá tan apaliwawa met ya anggapoy kasalanan to ed impatey ton may kobrador, inatey dimad pangawan a kabokbukoran to. Nabotan ko labat so inkaoyos na linawa to."
Tinmonday masiken; si Ibarra ag sinmalitan balot. Diad saman akasabi larad pintoy kuartel. Pinaer nen teniente kurang to, tan inderew toy lima ton nankuan:
