Sinmegep si Ibarra ed silir to ya akaarap ed ilog, inyurong tod sakey a yurongan a baleg tan nengnengnengen tod petek ton dorongawan so maawang a katawenan.
Samay kapetekan ya abong ed biek a pangdel na ilog maliwliwawan maong tan mansasbin anggad sikatoy maliket tan masamsamit a panliet na togtog. No komon ta si Ibarra et aliwan onman lay inkakusoy kalakal to, tan diad liket ton panusisa et tinakiling tod largabista no antoy nagagawad saman ya alimbos na liwawan pasen, naamamayo to komon so sakey a ngalngalin ag nasisian kanengnengan,-sakey ed saray singa payawar a gaway salamanka ya nanenengneng ed saray ankabaleg a panangipawayay ayayam ed Europa, ya diad masamsamit tan makalkalnan tanol na togtog, nanengneng ya onlesá ed pegley na ontan lan liwawa tan singa managos a brillante tan balitok ya aliberliber na adornon alay karakpan tan nankawés na singa milmilad dagen a maimimpis ya abel, so sakey a diosa, sakey ya inkantada ya manaakar a singa ag ondadapoy salí to rad dálin tan aliktob na sansananey a liwawa: diad arap to
manlesa ray karosasan, onggapo ray sayasayaw, mananieweng iray togtog, insan saray derimonio, inkantada, genio, mamarikit, ángeles tan pumapastol, mansasayaw ira mantotugtog ira, mantelektelek ira tan sakey tan sakey mangigatoy rigalo to ed salí ton man a diosa. Anengneng to komon so sakey a biin walad kalangueran a nagnap ed kalimgasan tan asimsimbang ed indengan ya akakawés na nidumaduma ed itsura tan dakep a kawes day bibiid Pilipinas, ya aliberliber na nambabangil a klasi totoo ya mansasalita tan
