ba ton abuek met lara, tan wadman a manimimaton! .....Samay masiken kaluplupa nen amá to, samay balolaki miparparad sikato, tan say ngaran a bibitlaen ton mannangis nimay masiken say ngaran ton díli!
Sikatoya so sankanengneng ton man a pangaskasíyan ed arap to. Narep laray silew ed samay kapetekan ya abong, tinmonda lay togtog tan arum niran tanotanol, et si Ibarra singa toni sankarengel so maerermen a bosis nen amá to ya anapen toy anak to ed oras na panpapanabos to.
Say kareenan insibok toy ambetebetel a panlinlınawa to ed Ibále tan singa naugip a mareereen so amin ya kapinalsaan; mibalbalesan a narengel so kokaok day mánok ed tanol day reloj ya wala rad tori kasimbaanan ed panotugtog day oras ya onlalabas, tan ontan met ed ingal na naksawan lan bantay no wala ray patondaen ton manaakar ed lansangan; ombubotay so asingger lan manlesek a bulan; amin manpapainawa, pati si Ibarra nala met lay pakaugip, diad kesaw to la lágid impanbaroy to onó saray sankaermenan iran kanunotan to.
Saman balet so párin pransiskano ya ugaw ni ya anengneng tayon ag onggalagalaw tan ag masmasel dimad utel na sayaksak ed salas na abong nen Kápitan Tiago, agni naugip, banbantayan toy lábi. Wadman ya akaakbab ed dorongaway silir to ya sankaampat tod lima toy amespesiaw tan mabeng a lupa to, tan nengnengnengen ton andi esel ed arawrawi so sakey a bitewen a mankidiam ed bilunget day katawenan. Nankalkalnan kinmuyep tan abural imay bitewen, ontan to met nimay melag lan bulan, et samay pári balet agnin siansia ginmalaw dimad kawalaan to: say imbales ton sankanengneng samay arawrawin singa nantekepay tawen tan dálin a samet napapaaninagan ed kelpay palbangon lan atapew, dimad banday Bagumbayan,(1) ya mamaarap ed dayat ya wala nid kaletay ugip.
Samay igaganggan a tinmuktok dimad pintoy silir to ya mamangon ed sikaton manmisa, so akatalibagad sikato ed panmumurekdek to.
(1) Diad sayan pasen a kaabay na Luneta so panamateyan da nen uley na kastila ed saray nadudusá ya onsusungpe ed Gobierno, tan dia met so amaltagan dad Rizal nen Diciembre 30, 1896. Wala ed paway na Intramuros, say gendat a Manila, ed bandar letakan tan diay pinasenan day pilipinos nen tinaynan day panaayaman dan Manila ta sinonson iray kakastila,-kanián inngaray Bagumbayan, salitay tagalog a say talós to balon báley.
