- Hágase tu voluntad así en la tierra!(1)
Legan dan naugip onó manaalmosal so kabat ti laran totoo, salitaen tayo balet si Kápitan Tiago. Ag iti nin balot abagaan ed abong to, kanian anggapoy pankanepegan tayon ag mangasikasod sikato ed anggan ankakabaleg iran pamaakaran.
Melag a too, malinew a kolor, matimtimpek ya impanlaman tan impanlupa lapod masulok na taba ya manlalapod tawen unong na kuanday mangidadayew ed sikato, tan kuanda balet na mamobusol ta manlalapod dala ray duká, si Kápitan Tiago mas ugaw so nengneng to nen say petepeteg a taon to: nabaloan a talomplo tan lima to labat. Diad panaon tonyan ulirán say kanengnengay lupa to masansantos a lanang. Say uló to malimpek, melag tan nanbuek na andeket nen say kamagón, ya andukey ed arap tan antiktikey ed beneg so inkakatli to, tan kuanday arum ta dakdakel so youló to; saray matá ton ankelag, anggaman aliwa ran pinkit, ag balot nanaomay kanenengneng da; say eleng to melag tan makisir balet ta aliwan kutep, tan no say sungot to komon et ag nadederal ed alablabas a panagtabako tan kagagagal to, ya tiptipunen to nimet so sepá ed pagpag ya aping to ya nababanking so asimbang ya impanlupa to, nayarin ibaga ya walay pankatunongan ton pangipasen tod inkasikaton dili ya maong a lakí. Ontan man a gawá to siansian ampotipoti ray ngipen ton díli ya pati duara met ya inter na dentista ed sikato ya nambayaran toy labinduay pisos kapag sakey.
(1) Unorey linawam diad dálin!
