Bantog a sakey ed saray sankayamanan ya walaan ed Binondo (1) tan sakey ed saray sankabalgan ya hacendero (2) nisengeg ed saray maawang a daldálin tod Pampanga, Laguna de Bay, tan lalo lad San Diego ya say kánon et itatagey ton tinaon. Sankagustoan to met a baley so San Diego manlapod saray mababig ya amesan to, say nibantog a bulangan, tan saray arum nin pakanunotan to. Agto sasapoey onlan tinaon a katiktikeyan lay duay bulan a panayam tod man.
Si Kápitan Tiago dakerakel so dálin to ed Sto. Cristo, diad lansangay Anloague tan ontan met ed Rosario; sikatoy angontratoy apian a diad saya kamuyong toy sakey a intsik tan agla nakaukolan ya ibagay kabaleg na tutoboen da. Manpapakan ed saray piriso ed Bilibid, tan manrarasion met na dika ya kaney kabayo ed saray ankakabaleg ya abong ed Ibále ya saya kontrato met. Maong so papil to ed saray manouley, amta toy gaween to, masulong tan masebeg a mipalaran no nipaakar ed pankaukolan day arum a too, tan bukor toy tatakutan a katagam na sakey a toon manngaray Perez no nipaakar ed panagarrienda onó panagsubastay empliyo ya gawa yan ipipiyay Uley diad Pilipinas ed saray totoon partikular. Kanian diad panaon ya indalan dara niay totungtongen ya agawgawa, si Kápitan Tiago maliket ed panbibilay to, ed anggaay nagawat a panliket na sakey a toon melag ya impanguló ed saraman a polo: nayaman, agmisisiblangan ed Dios, diad Uley onó diad saray totoo.
No say agto pisisiblangan ed Dios ag panduaruwaan, a singa lawari religion. Anggapon balobalot so makasengeg na pisiblangan tod sankaabigan a Dios ta maong so panbibilay to diad dálin, ag met nin balobalot akisalitad Dios, ni apabayes toy kuarta. Agto met nin balot inarap ya akikasian onó nandasalan ya anggan kapigan man a pankapilitan to odinó inkaseldet to; sikato mayaman, tan say pilak toy mandarasal: say Dios wala ray makapanyari tan mapasang irán papárin pinalsa to ya manmisa tan mandasal. No say pannobinas tan panrosario, wala met iray pinalsay Dios ed sankabalgan a panangasi to, ya totoon mairap ya
(1) Diad panaon tanyan uliran, say Binondo sikatoy sankayamanan a distrito na Ibále ya wadman ya asimpok so komirsio.
(2) Sakey a toon maawang iray daldálin to.
