onkanad kaabigan day mamayaman, totoo ran no itdan mo ray anggan pisos labat et sarag dalay mandasal na anggano labinanem a misterio, tan basaen dalay amin a libron nipaakar ed kasantosan ya pati Biblia ray hebreos(1) no napanoay daiset so ibayar; tan no nasabi naseldet a pinasia ya nakaukolan toy tulong na tawen et anggapoy nasingkat ton kandilan ambalanga ya gawá ray intsik, sikatoy yapireng tod saray sasantos tan sasantas a kawalaay dibosion to ya nambabangil so sipan tod sikara ta piano napasoot to laran napaesel tan napanisia to rad kaabigan day pilalek to. Say sankarakelay sipan to balet tan sankatooran tod pananumpal say Virgen ed Antipolo, (2) Katawan tid Kareenan tan Maabig a Panagbaroy, ta no diad saray arum a sasantos ya ankelag, makapaturing a misipan, salawasaw ni ingen no arum. Mabetbet a no nala to lay kekerewen
to, agto lara amta; tuá ta agto met lara pipiduaen a gugunigonen ya anggano nasabi ni lamet so pankaukolan to; ta amta ton akamayamay ni sasantos ed kalindario ya anggapo angankon balot so gawa rad tawen. Sakey ni, si Kápitan Tiago mas ni isisipen ton pakauley tan siglat a manulong na Virgen ed Antipolo nen saray arum a Virgen ya anggano wala ni sankabenbenan dan baston iran pilak ono ugaw a Jesus a lakseb may akakawes, odino eskapulario, balsakan may balbalkes. Sa angankoy makasengeg ed saya ta say Virgen ed Antipolo bantog a masebeg, agto labay a namurmuray ngaran to, kabusol toy pairitrato ya kuay Sakristan Mayor, tan no ompetang so uló to ondeket a singa kamagón, ya aliwan singa saray arum a Virgen a mas atlemek so puso ra, mas mapagusto ra, tan mas mainomay day mamirdona. Aliwan maamot ya wala ray totoon mas katalagpitan day sakey ya arin nasnaspot so pakayari to nen say malokak a manuley ya unong ed saray insulat a ganggan ed bansá, ya singa natasian
(1) Ngaran ya impanawag ed Abraham tan amin ya manomtumbok iran boleg to. Si Abraham sikatoy Patriarka tan pinagkaamay lapag a báley na Judío.
(2) Sayan talintaoy Virgen nanlapo ed Akapulco, Mexico ya inawit dia nen Kapitan General Juan Niño de Tabora nen sinmabi dian manuley ed Pilipinas nen taon a 1626. Nisesengeg ed panagmilagro tan panamatonda toy bagyó, aminpigan nanpawilpawil ya inaawit dad sakayan na Gobierno anggad impangian dalad sikato ed sakey a simbaan ya impaalagey ed kapukdolan ira ed mianen a bukig na Ibále ya walad panangasikaso ray papárin agustinos. Legan ya ipapaalagey yan simbaan, aminpigan pinmayawar ed saray totoo ed toktok na sakey a kiew ya tatawagen day antipolo ya sikatoyay nangapoay ngarán to.
