nen Luis XIV tan LUIS XVI, Felipe II tan Amadeo I. Sikato met ya angankoy makasengeg a diman ed nibantog a simbaan to nian Virgen manaakar iran talimokor so pati saray intsik tan kakastila, tan salabat so ag natalosan say no akin et nibabatik day papári so kuarta tonyan makapataktakot a talintao, onla rad América insan diman ira mangasawa.
Samay pinto ed salas a sinanibay kortinan sutla, ontalos ed melag a dasalan ya ag manepeg ya onkulang ed dinan man ya abong a pilipino; wadman iray diosis na boleg nen Kápitan Tiago, diosis kuanmi, ta sikato sakey a toon mas makiling ed akamayamay a Dios nen say saksakey, ta sayay inkasaksakey na Dios agton balot natalusan. Wadman iray talintaoy Sagrada Familia ya say uló, kabalgan, lima tan sali ra et garing, say máta ra salming, andurukey so palatang da tan kulet so buek dan singa kolor na buek na mais a sikarayay marakep a kimey day managgaway talintao ed Sta. Cruz. Wadman met iray kuadro ya gawa ray managpinta ed Paco tan Ermita ya ipapanengneng day impanpapairap ed saray sasantos, saray milagro onó gáwa ran makapakelaw na Virgen, etc.; wala met so Sta. Lucía ya akaarap iray matá tod tawen tan sankabenbenan toy lipong ya anginay duara nin matá ya walay palatang tan kirep da tan andi duma rad samay nanenengneng ya akapinta ed triangguloy Santísima Trinidad onó diad lubok day egipcios; si S. Pascual Baylon, si S. Antonio de Padua ya akakawes na gingon" (1) tan sankanengneng ton makananangis so Ninyo Jesus a sinolongay kawes na Kapitan General, sombriron taloray suyok, sabli tan botas a singa nanengneng ed sayawan day ugugaw ed Madrid no walay mangalig na itsuray Kapitan General diad Pilipinas, a say pakatalus nen Kápitan Tiago ed saya so anggano ipano ni Dios ed pakayari to so pakayari sakey a Kapitan General ed Pilipinas, aliling tonin siansiay ugaw-ugaw ya panaggalawan day papárin pransiskano. Wadman met si San Antonio Abad ya walay baboy ed abay to ya diad panagnunot nen Kápitan Tiago sayan baboy milagroso met a singa kaolop ton Santo, kanian antakut ton tawagey baboy no ag pinalsa ya kienen Sinyor San An-
(1) Klasi abel a gagawaen ya abito ray paparin pransiskanos.
