melag ya aganggano nin impalapag so sakey a sirmon a sinyas, ya insirmon na sakey a talintaoy Sto. Domingo ed Soriano? Samay Santo ag sinmalita balet ta diad galagalaw to natalusan, sikatoy atalusan ton may nanggaway libro, ya ipapakabat toy sampot na mundo! Insan, akin ag met nasasalita ya say Virgen de Luta ya walad baley na Lipa et linmarag so sakey ya aping to insan kapipitek so saloy na kawes to? Ag masulosulok yan pakanengnengan a saray masagradon talintao et mamapasiar met iran agda itagey so kawes da insan manlilikna met iray pangal a nisesengeg ed kaugsan tayo lági? Sakey ni, akin ag anengneng na matá ton dili ya saray Kriston inpasak kapag sirmoy Siete Palabras. (Pitoran Salitay Dios) no Viernes Santo igalaw tan ite wek day uló ran mamitlo ya makumkompas, a pannangisan dayay amin a bibii tan totoon masibeg ya intalagá larad tawen? Anto ni anapen a mas nen saya ey? Sikamin dildili anengneng mi mansisirmon ya impamurya tod katoowan so sakey a panyon kadádala ed oras ya impanangtang ed Katawan tin Jesukristo ed krus, tan onterter met la komoy luá mi ya naskey kami kasantosan, no ag labat samay sakristan, ya impaspasiguro ton galaw labat iman, ta samay dalá, daláy manok ya inkalot tan kinan dan andi abala ed saman ya agew anta Viernes Santo. . . . . tan si sakristan matabatabá kanian si Kápitan Tiago ta anggaman masantos et mapasakbay, gagaween toy anggaay nayarian ton ag isingger ed samay kampilan nen S. Miguel; "Mas maong lay paliisay kaatapan," kuantod sikaton díli, "amtak ta arkangjel, balet ta agko manpiya, ay andi, agko manpiya!"
Tinaon ya mimilad perigrinasion ed Antipolo ya awit toy sakey ya orkista. Bebetangen toy duaran Misa de gracia ed taloran nobinas a gagaween, tan ontan met ed arum iran agew ya anggapoy nobinas, insan manames ed samay bantog a batis onó sobol a nanamesay masagradon talintaoy Virgen. Kuanday totoon masantos ta nanengneng da niray bakat day sali to tan buek tod man ed bató nen begnawan to, ya singa sakey a biin bengat la ya mankakanay larak na niog, tan singa bilang say buek to et balatyang onó brillante tan say belat to et sanlibon tonelada. Labay mi komon a sayan tatakotan a talintao et isikdak ton maminsan so masagradon buek to ya nanengneng dara nian masasantos
