a totoo onó italpak to rad dila odino uló. Dimad gilig ton man a sobol so nakaukolan a panganan nen Kápitan Tiago na litson, sinegang a dalag ya ininay bulong na alibangbang tan arum niran sirá ya manananam. Say gastos tod duaran Misa, apat a lasus pisos balet ompapaway a mamura niya no nunoten so galang a niiter ed Inay Dios na saray ikakanan dalig ya apoy, koitis, bomba, palpaltog, tan ontan met no kalkuloen toy panubo toy ankakabaleg diad entiron sakey taon ed tulong dara nian misa.
Balet ta aliwan Antipolo labat so pangipapantaan toy malagak a panamabli tod Dios. Diad Binondo, diad Pampanga, diad San Diego, kapag walay ibulang ton manok a baleg so iposta to, mamayakar lad kúra na kuartan balitok ya iter ton Misa ta pian maong so kasumpalay pibulang to, tan diad aliling day Romano a kasakbayay pibakal da et mantepet irad saray papári ran manangipasakbay na nagawa ya nanengneng daya ed katetekiab tan kakaoni ray mánok iran sagrado ya pakanen da, ontan met so gawá nen Kápitan Tiago ya unong ed pananisia to tan kurang na panaon. Sikato balet saray nengnengen to say apuy na kandila, say asewek na pasob ya insyinso, say tanol na bosis na párin manmisa, etc., tan ditan to talusan no antoy onsabin palar to. Kabat tan sisiaey karaklan a si Kápitan Tiago mataltalag a natalod postaan, tan no atálo sa angankoy makasengeg ta pagás so párin angantay misa, daiset so silew a sinelselan ed altar, odinó makapoy a klasi kandila ta napnoy sibo, onó walay akapilan tanso ya niiter to, etc., etc. Inpaspasiguroy sakey a celador na cofradía ed sikato ya saraman a kakaapay ilalo to panosubok na tawen ed sikato ta pian mas ondalang so pananisia to tan peket na linawa tod Dios. Inararo ray papári, kagalgalang day amin a sakristan, aalokaloken day intsik a gomagawa tan managlakoy kandila, tan ontan da met na gomagaway koitis tan arum niran palpaltog, sikatoy sakey a toon malikeliket ed religion diad tapew na dálin tan wala niray totoon masasantos ya ibaga ran baleg met so pakayari tod tawen.
Ag met napanduaruwaan a manbibilay ed kareenan no nipaakar ed Uley, anggaman saya et mairap komon a nasisia. Sikato sakey a toon agton balot
