dosinan baston. Aka-frac tan aka-sombrero de copa ya onlad Ayuntamiento,(1) Malacañang, tan diad kuartel; aka-sombrero de copa tan aka-frac met ya onlad bulangan, tindaan, diad liblibot, diad lakoan day intsik, a diad silong ton man a sombriro tan dalem ton man a frac, si Kápitan Tiago kalamor mamotbutayong lay linget to ed salimoot tan kesaw to lan mangiwawaswas nimay baston ton nanborlas, (2) tan mangooksoy, mangaapiger tan mangugotgot na amin ya aasikasoen to, ed kulí ton makapakelaw tan binbinta tan magámagá ton lalon makapakelaw ni.
Kanian saray mamakauley ipapasen dan maong a too, marakep ya inkawalna, maliket ed kareenan, matulok, mapagalang ya agton balot manbabasay libro onó palapagan a manlalapod España, anggaman maong a mangastila; say liknaan da no nanenengneng da miparparad liknaay sakey a estudianten mairap no osusdongan toy takon na sapatos ton daan ya ayesyes nisesengeg ed panangiákar to. Diad kinen Kápitan Tiago ompapasen ya walay katuaan so saramay duaran panangibaga ray kristiano tan sara met so anggapoy pananisia ya beati pauperes spiritu(3) tan beati possidentes(4) tan nayari met ya ipaakar ed sikato may kuanday arum ya aliway inkitalos ton nanlapod salitay griego: 'Gloria a Dios en las alturas y paz a los hombres de buena voluntad en la tierra!' (5) ta unong na nanengneng tayod bandad unor, aliwan dapot maong so linawa ray totoo et manbilay lara ed kareenan.
Saray anggapoy pangitaltalek ed religion, ipapasen dan gonggong, saray mairap kuanda ta anggapoy panangasi to, maruksa tan pepespesen toray masegsegang, saray walad saginonor to kuanda met ta masebeg a say gusto to gusto to. Saray bibii balet ey? Ah, saray bibii! Dengeldengel iran makaekal na galang so nanaamingaw ed saray masegsegang iran alolong, tan wala ray mangibagá ya dengdenglen irá no arum so paningel tan pansibek ya akilaok ed akis na ugaw a kapangianak. Aliman'.
(1) City Hall so ngaran to natan.
(2) Samay borlas na baston tanday eegnaan ton betang.
(3) Mapalar iray abeban linawa ta kien day nanariay tawen.
(4) Salitay Latin a say labay ton ibaga 'Mapalar iray walaan ono máyá-
(5) Nagalang tan narayew so Dios ed katawanan tan kareenan ed saray totoon maong a linawa diad tapew na dálin.
