wan saksakey so biin wala nid kalangueran so nitoturó ray kabkaabay a tarok na balaw tan panmurmura; tan saya nengneng toy singa anggapo lay wala ed sikato ya anggan antoy labir, tan nengneng na pagew toy nalnes. Saraya balet a nagagawgawa agdan balot pupúyatey Kapitan Tiago; anggapo ni biid kalangueran ya akagonigon ed sikato; say mamapairap ed sikato sakey ya akulaw a milalaslasan ed sikato ed panangipatnag na panangaro ed Dios, sakey ya akulaw a mas so kadadayew tod saray papári nen say anggan kapigan man ya impangidayew dad Kápitan Tiago. Sikato tan sayan akulaw a baló ya tomatawir day agági tan kakaanakan to ra, ag ira maniiteray punget no nipaakar ed kasantosan, tan sayan panlalaslasan da onggaganad kaabigay simbaan a singa say kompetensia ray sakayan ed Pampanga ya saray totoo so napapaabig. Mangirigaloy Kápitan Tiago na baston a pilak a binotakbotakay esmeralda tan topasio ed Virgen? Si Donya Patrocinio mamagawa met a tampol na baston a balitok a binotakay brillante ed bantog a platiron Gaudinez; no diad libot na Sto. Rosario et mamaalagey si Kápitan Tiago na palámirin duaray lupa to ya kinawesay impipiligis tan pinapaselkag ya abel, iniinay espejo, globo ran salming, lamparaan tan silew iran nankokumpog, si Donya Patrocinio mamaalagey met na palámirin apatiray lupa to, patágeyan toy duaran bara tan palakbatan toni nambabangil ya insasabitsabit iran parakep to. Si Kápitan Tiago ed satan mamasia la, mangiter na misan iba toy bomba tan akamayamay iran koitis, a baleg so irap nen Donya Patrocinio ed saya ta masiadon naninerbios, mantotopaay ngares ton manketket ed bibil to no makalangakang laray kampana tan mankilalbong iray bomba tan palpaltog. Manimimis si Kápitan Tiago ed satan, balet ta si Donya Patrocinio nonunoten to met lay pakabales to: bagaan to ra ya bayaran toray kuarta ray arum a totoo, so sankaabigan iran mansirmon ed saray limaran togiop day papári ed Ibále, saray nasasalitan maong a manalitad Catedral tan saray Paulistas,(1) tan pansirmonen toray kastila no agew iran pista tan ngilid gawa ya nipaakar ed araralem iran
(1) Paules met so sakey nin pananawag ed sikara ya sikarayay amin a papárin walad silong na togiop ya inletneg nen San Vicente Paul nen taon ya 1625.
