gá; no sikan manbabasa et asalim lay angaro, masulosulok so pakatalus mo, et no agmo ni asáli, anggapoy kabaliksay pangibagak ed sika, ta saray agni angaro agda natalusan irayan misterio.
"Say pakaisip ko, María, ta sustoy ibabagay doktor," kuanen Kápitan Tiago. "Nepeg moy manayam ed lúyag ta amespesiaw ka, nakaukolan moy maong a dagem. Antoy kuan mod Malabon. . . . . . onó San Diego?"
Diad impakabitlad ngaray unor a báley, binmalangan singa kayangay lupa nen Maria Clara tan ag akaebat.
"Laka yo nen Isabel natan ed colegio ta alá yo laray kawes mo, tan manpatanir kalad saray kakaarom," kuanen Kapitan Tiago ya ag tinmangua; "ta agka la ompawil."
Singa inmermen si María Clara ed pannodnunot tod itaynan ton agla pawilen so sakey a pasen a nanayaman ton malikeliket, balet ta atimpey na sananey met a kanunotan iman ya alikna ton kaermenan.
"Diad loob na apat onó limay agew, no wala laray bálon kawes mo, onla itilad Malabon. . . . Si padrinom andi lad San Diego; samay párin anengneng mo dia kalabian, samay ugaw ni, sikatomay kúrad man, masansantos."
"Mas maong ed sikatoy dagem ed San Diego, primo," kuanen Tía Isabel; "sakey ni mas maong so abong tayod man, insan araparapen la nimet so pista."
Diad liket nen María Clara labay ton lakapen wari tía to ed impangibaga toy onia, et kangel tod luganan a tinmonda, pinmesiaw a maong so lupa to.
"Ah, suston tuá!" kuay ebat nen Kápitan Tiago, tan diad sananey a tono inkuanto: "Don Crisóstomo!"
Naplag nen María Claray dadaiten to, labay toy onalagey et agto makagalaw tan manggiwgiw so amin
a kalamanan to ra. Sankarengel so onsesegep ed takayan, insan sakey a bosis na laki ya wala nid kalangueran. Saman a bosis singa bilang walay pakayari ton mansalamangka, ta biglan akagalaw si María Clara tan batik a linman inmamot dimad silir a dasalan a
