saraman a bekta ya say kanunotay duan kataon nagnap ed liket et mantatalusan a malinlinew ed mogmon pakapanlimgisan da labat, say salita matantan a tuloy, magasal, makapoy, a singa aliling na pandumaay malaragurog a tanol na karol tan say makaseleng a liwawa tan siglat na kirmat: kabaliksan toy mangibesngaw labat na sakey a liknaan a kabat la, sakey a kanunotan ya atalusan la; tan no ikakana, andi arum a makasengeg no ag say pilalek na puso ya manouley ed laman tan manlipuad liket, a labay ton say sigpot ya inkatoo, ya tekep toy amin a pakayari laman tan kanunotan, et iparungtal toy kansion a maliket ya idadangoan na kamarerua. Diad tepet na aro ya tarok na ilimgis a maamot may maparungtal, anggapoy amtan pakaebat na salita: say onebat say imis, say yangob, say mapalpalnan ingeswa.
Nen saramay saninaro, diad impaliis dad dabok ya ipapanis nen Tía Isabel et linma rad mad batalan a bató pian diman ira mankanawnawan mantuyaw ed silong day palapala, antoy sinalita rad mapalpalnan bosis da ya ontan lay pankigtot yo, oh sikayon ambalbalangá ran rosas na cabello de angel?(1) Sikayoy manepeg a manungtong ta ambalbalingit so samiong na linawa yo tan bibil yo ray aparakep ed kolor; sikan mapalpalnan amiyan a nanaamingaw mo ray maananlay tan nidumaduman anieweng ed kareenay labin ambilunget ed pegley day agni asakosak a katakelan, sikayon sinag na banwa ya pakanengnengan kayoy dalang na Andi-Angaan diad tapew na dálin, sikayoy manungtong, ta siak saray matabtabang a liknaan labat so amtak iran isalaysay.
Et bangta ag kayo maabuloy, salien koy anggaay nayarian ko sirin a gaween. Malinlinew ya inanágan so tawen: say amíyan ya anggapoy tarok ton balingit day karosasan, mapalpalayupoy a sipsiplugen toy kabulongan tan rosrosas day impapakalab a tamtanaman, - kanian manggiwgiwgiw iray cabello de angel, - wakawakál, saramay sisiran impapamaga tan paroparol iran nanlapod China. Say tanol day begsay ed kaabay ya ilog tan saray luganan ya ondadalan ed taytay na
(1) Tanaman ya ipapakalab a malamlambot tan mayumyumis iray bulong to, tan nanrosas na mapalet iran ankelag ya ambalbalanga.
