Binondo malinlinew ya onsasabid man ed kawalaan da, balet ta agda nangel so meremeré nen akulaw.
"Maong met no ditan kayo, pian banbantayan da kayo ray amin a kabkaabay," kuanto nia.
Diad kagapo saray tungtongan da andi kakabaliksan, ya aliling daray langlangtaw day kabansáan ed Europa, ya masamsamit irad pakangel day totoo ran díli, balet ta makapalpalek onó makapakuliseng irad saray taga arum a bansá.
Si bii, manlapod agí nen Cain, (1) mainion kanian oniay tepet tod inaro to:
"Lawas mo ak kasin sankanunot? Ag mo ak kasi alingoanan ed ontan lan kinarakel na nanlalapoan moran ankakabaleg iran siudad tan karakel na anengneng mon malilimgas a bibii. . . ?"
Si lakí ta sakey met ya agí nen Caín, maong a onliktas tan matilá met na daiset, kanian:
"Panoy pakalingoan kod sika ey?" kuanton inmebat a nengnengnengen ton nanaayapan so mararakep a magmagket iran matay inaro to, --"panoy ikulang kod sinambaan ko ya sakey a sipan a sagrado? Nanunotan mo nimay lábin bagyó ya nen sankanengneng mo ak a mannangis a bokbukor ed abay na bangkay di inak. et dinago mo ak, intapew moy limam ed abalak, satay limam ya andukey lan agew ya agmo la padidiwit ed siak, tan inkuanmo: 'Inatey so inam, siak agkon balot asali walay ina'. . . . . tan mannangis kad abay ko. Masiadoy impangarom ed sikato tan ontan to met ya inaro to kan singa díli ton anak. Diad saman mapalaloy peles na uran tan betbet na kirmat, siak balet singa dengdengelen koy maananlay a togtog tan singa sankanengneng kon makakaimis so amespesiaw a lupay bangkay. . . . . ah! no komon ta mabilay iray ateng ko tan nanengneng da ka natan! Binenbenan kod saman so limam tan say lima di inak, tan sinambaan kon aroen
(1) Say panguloan ya anak nen Adan tan si Eva, si Caín, say onkomadua si Abel. Sarayan sanagi nandumaan ira, si Cain makapoy ya walná; si Abel marakep ya ugáli. Si Cain masiadoy imon tod agí ton Abel to saya inararoy Dios manlapod kaabigay ugáli to. Sakey ya agew diad imon tan siblet nen Cain, pinatey toy agí ton Abel. Diad saya, nangel, toy bosis na Dios a nankuan: "Cain, iner so kawalaan nen agim ya Abel?" Tan oniay inebat to: "Amtak pa lági? Akin siak so bantay nen Agik?" Kanian si María Clara lapod maimon, imbaga nen Rizal ya agi nen Cain ed liknaan, tan ontan met nen Ibarra ed kaliliktas tod tepet tan say inkatilá to.
