ateng dan inmona, tawtawagen koy ngaran mo, tan singa ka onpipinta ed kelpa ya ontatagey a manlalapod mad mapatar a dálin a nansasalipongpongay palandey, singak sankarengel so bosis mo ed esaes day kabulongan, tan no saramay taga uma ya ompapawil ed kaabongan dan nanlapon nankimey et mangankanta rad dalan, say pakaisip ko singa ra mipapara ed liknaan kon dili, ya kakantaan daka, tan iitdan day katuaan iray kogkugip tan pilalek kora. No arum nabalang ak dimad utel na kapalandeyan tan naabotan ak dimay lábi ya akarakar a manaanap na dalan ed utel na mapalet iran kakiyewan, tan diad sinag na bulan a makatalostalos ed nanlalaetay onman lan kapal day sangasanga, singa taka sankanengneng a wadman met ed utel na katakelan ya aliling moy sakey a maararon anino ya labaslabas ed nanlalaetay liwawa tan kabilungetan; tan diad pakangel koy masamit tan maananlay a kantay ruiseñor ipasen kon tampol a nengneng toka met tan kakantaan toka. Insan mo tepeten no sankanunot taka! Say petang na árom so angantabay ed siak ya aliwa labat lan pasasayaksaken tod maták so ambilunget a kelpa no agta iitdan toy marakep a kolor so pati hielo ya amusiak ed potí! Diad Italia say tawen ya alay dakep tod nidumaduman abig na inka-inanágan tan linew, sasalitaen tod siak iray matam, saray maliga toran pasen ipapanunot day dakep na kakaimis mo, tan ontan da met na maawang a kaumaan ed Andalucia, ya sipsiplogey ambalbalingit a dagem tan kawalaan dan asimpenay pakanunotad bansá rad Letakan, a napno ray anlong tan karakpan, andi, arum a sasalitaen dad siak no ag say panangarom! No managaag so bulan tan walaak a mansasakaysakay ed ilog na Rhin tepet-tepeten kod kalakal ko no agak kasi nalolukoy pilalek kon díli, ta sankanengneng takad mad pangdel ed sengeg day kakíyewan, dimad bató na Lorelay, (2) diad saray daldaluyon, ya mangankanta kad kareenay lábi, ya singa samay sasalitaen dan inkantada ya mangiiter na ligliwa ed kabukoran tan kaermenan daran man a nagegeba laran kastilyo!
(1) Mánok ya atap a masamsamit tan makaayayap so kakauni to.
(2) Sakey yan baton baleg ya akaalagey a mapmaptek ed gilig na ilog a Rhin diad pasen a nanlaetay Saukt tan Obserwesel, a mangiiter na baleg a kaatapan ed saray managsakay, tan nibantog ed dakep day anieweng to. Kuanda ta say inkantada ya manaayam ed saman a bató, mabetbet dan ikankantay omaanlong ed saray birso ra.
