"Siak agak nanbaroy a singa sika, say amtak labat say báley mo, Ibále tan Antipolo," kuanton inmebat nen María Clara, ya manimimis ta sinisia ton amin so inkuay inaro to; "balet ta nanlapod samay impanpatanir kod sika tan inloob kod colegio lawas takan pinunot ya ag takan balot alingoanan anggan onmanlay panangiganggan na pári ya pankokonpisaran ko, tan karakel na iiter tod siak a dasalen a dusa. Sankanunot koray panaggalaw ta, saramay siblangan ta nen ugugaw itani. Pilipiliyen mo ray sankaabigan iran sigay ed panggalaw tay pungkit, mananap kad ilog na sankalimpekan tan ankekelag a batobaton nambabangil a kolor ya ikana tad kotdo, mapalaloy inkatorpim, atalo kan lanang, tan dusaen takay pitpit anggaman agko ikakasil so pamitpit ko ta kaskasian taka. Diad sungka masiadoy inkasaol mo, masaol kani nen siak, kanian naynay a say kasumpalan ta samsaman. Nanunotan mo may impanpasnok mon tuatua? Impanirap mo ak a maong, balet ta no nanunotan ko nen wala ak lad colegio makaimis ak, tan anapen taka ta pian mankolkol ita lamet insan ita manpaabigan a tamtampol. Ugaw itani ed saman, linma itan manames ed samay kulos ya walad sirum day kakawayanan ya iba tara di inam. Diad gilig akamayamay iray tubotubon tamtanaman tan rosrosas ya ibabagam ed siak so kangaranan dad latin tan kastila ta manaaral kalad saman ed Atenen. Siak balet ag taka aasikasoen ta manousil ak na ampapaya tan andirit ya wala ray pinopinoy laman dan singa ra tolaing tan kolor na payak daray singa bunlalakaw, a manaabotan iran liberliber dimad karosasan; tan no arum labay koy mansinkat niranmay ankekelag a sisiran labotlabot ed kabatoan dimad gilig na danum. Kasanlilikna naandipat ka, tan nen ompawil ka awit moy balanget a bulong tan rosrosas na naranjita ya intoon mod ulok tan inngaran mo ak na Cloé; inggawaan taka met na balanget mon nanrosas ya wakal. Di inam balet, inala ramay balanget ko, pinitpit day bato insan da inlaok ed samay panlubas ta; akaterter so luam tan
(1) Colegio ya ikukorang day papárin Jesuitas.
(2) Bilay a bii na sakey a tungtong a gaway sumulat a manngaray Longo nen komapat a siglo. Sikato tan say kaaroan to ya manngaray Dafnis, adokdok iray nankaduan boleg day pumapastol na karmiro, ed palandey, nen ankekelag nira. Tinawir da met layan anapbilay, akapanaroan ira, dinmalan irad dakdakel a segsegang, balet ta aloksoan dara ya tan akapankasal ira tan nanbilay iran maliket.
