inkuan mo ya agda natatalusay mitologia; 'Bantiwel!' kuandan inmebat, 'nengneng mo no ag ambalbalingit so buek yo naani.' Manelek ak, binmarong ka, agmo ak labay a pisalitaan tan ontan lay binbintam a sanagew, a pati siak et makananangis ak met la. Nen ompawil itila mapalaloy petang na agew, kanian angala ak na bulobulong na sobósob a tubotubod gilig na dalan ta pian yapis mod dalem na sombrirom et ag onsakit so ulóm. Akaimis ka, binembenan takad lima tan nanpolangan itala."
Akaimis si Ibarra ya malikeliket, nilukasan toy pitaka to tan impaway toy papil ya amalkotan toy pigaran bulong ya amagaan laran dinmedeket, balet ta siansia ran ambalbalingit.
"Niraya may bulong mo," kuanton inebatay tepet ed limgis nen María, "sikarayan amin so inter mod siak."
Si María Clara kinaot to met a masigsiglat ed pagew toy melag a bolsan sutla.
"Ps!" kuanton pinitpitay daiset so lima nen Ibarra, "ag nayarin diwiten, sakey a sulat ya impanpatanir."
"Satan imay sulat kod sika nen kasakbayay isipot ko?"
"Wala ni sirin so arum a sulat mod siak?"
"Anto ray inbabagak ed sika ey?"
"Langtaw ya ankakabaleg, barbaraan na toon matiwer!" kuay ebat ton makakaimis a pangipatnag ton apakpaknaan to raman a tilatila. "Mandeen ka ta basaen ko, balet ta lagsanan ko lara yay lanlangtaw mo ta kasi kamet."
Intagey toy papil ya insanib ed matá to pian ag nanengneng nen Ibarray lupa to, insan to inggapon binasa:
"'Sanka'. . . ., "lagsanan ko lay mantumbok ta tila met labat!" Insan to imparlas iray matá to ed pigaran karasig. "Di amak ipasout daak ya papikalen ya anggan antoy pikakasik ya ag onalis. 'Nagnap kalad inkatoo,' kuandad siak, 'tan nepeg mon nunoten so arapen
(1) Awaran a nipaakar ed saray dioses tan bilay ed saray uliran daran may totoo nen inmonan panaon ya ag isa manisia ed saksakey a Dios.
