Ag inmesel si María Clara. Nilimgis toy ankabaleg iran matá ton alay dakep, angetel na pigaran rosas tan inderew ton nankuan:
"Laka la, ag taka abalaen; mannengneng ita lamet ed kayari pigay agew! Nirayay rosas ya igaton mod lubok day ateng mo!"
Nagogunoyan ed saya onaakseb lay Ibarra ya intolor nen Kápitan Tiago tan si Tía Isabel; si María Clara balet nantalak dimad silir a panagdasalan.
"Kasian yo ak palan ibagad Andeng ya iparaan toy abong ta onsabi rad man di María Clara tan si Isabel! Maong komoy panbaroy yo!" kuanen Kápitan Tiago nen onsasapat lay Ibarra ed luganan a kinmorang ya amaarap ed plasay San Gabriel.
Insan kasegep to inkuanton singa pangoyong ed María Clara ya mannangis ed abay na sakey a talintaoy Virgen:
"Manelsel kay duaran kandila ya sanderuan real,(1) sakey ed Sinyor San Roque tan sakey ed San Rafael ta patron iray manaakar! Selselan mo met so lamparaan na Katawan tin St. María ed Kareenan tan Maabig a Panagbaroy ta dakel iray tulisan. Mas maong lay nagastosay apatiran real a lilin tan anemiran kuarto(2) ya larak nen say manbayar na balbaleg ed panondon naani!"
(1) Say sakey a real labinduan sintimos tan kapaldua.
(2) Say pisos, sanlasus tan anemaplon kuartos,
