Say panlugluganan nen Ibarra ondadalan ed pasen a sankasayaksakan ed Ibále; saramay anengneng to kalabian ya akapaermen ed sikato, no nengnengnengen to ra natan ed liwaway agew agto napokpokay pakaimis to.
Samay sayaksak a singa manleluag ed biek tan biek, luganan iran nanduruman nengneng a mansasabatan a mapmaples, kalisa, karomata ya dibakal, saray europeo, saray intsik, saray naturales a sakey tan sakey et akakawes na kawes ed bansá to, saray managlakoy bongabonga, saray liberliber a nansakbat na ilalako ra, saray lakseb a managsakbat, saray lakoay kakanen, saray napagtuloyan a panbayaran, saray restauran, saray pakanan, saray tindaan, pati saray kariton a gagayogoyey dueg ya amagamaga tan singa anggapoy walawalad sikaton manaakar ya alabas nen mannonunot na araldalem legan ton manggagayogoy na akibebelat iran aawiten; amin iraman, say nambabangil a tanol, talakatak, pati say dilin agew, angob a sansananey, kolor iran marmarlang ya ag nantotokuyan singa ra liliingen ed kanonutan toy dakerakel a pannodnunotan laran naugip.
Singa to sankanengneng so itsura daran man a lansangan nen ag nira binató. No onagew a duay agew
manmaliw iran dabok a nakukubotan ton amin, makapaokok tan makabulag ed saray manaakar; kauran ton sanagew, manmaliw laran luak a mananinag ed sikaray parol day luganan no lábi tan panoen day talagsik na pitek iray manaakar ed gilig na lansangan ya anggano kaarawi limaran metro. No pigara lan bibii atilak diman a nibiret ed pitek so sinilas daran binobor-
