ray luganan mapmaples iran onlalabas a mananinag ed kapanbarnis a kaja ray sinag na agew ed tawen ya anggapón balot so lurem to; bukor to labat ya ugaw a labinsakey taon to, kasabisabi ton nanlapod luyag so sinmibeg, bukbukor toy nankogip na makapataktakot ed ontumbok a lábi.
Anggapo lamay sankakanaan a Taytay na Barcas, samay taytay a pilipino ya ginawa to kalamor so anggaay nayarian ton inpansirbi ya anta ontan lay kapov na inkagawa to ya ontagey tan onabebá ya tuloktulok ed labay na ilog na Pasig ya aliwan aminpinsan to lan pinaspasan tan dineral.
Saramay kiew ya salisay ed plasay San Gabriel (2) ag ira kinmabaleg, nakbetan nira.
Say impakanengneng tod Escolta (3) singa kinmapoy, anggaman walay baleg ya abong ya impaalagey ed pasen daran may dagdaan a kamarin nen saman.
Atawag so imano tod balon Taytay na España (4) tan diad impakanengneng tod saramay abong ya wala rad utel na kakíyewan tan kakawayanan ed nikawanan a pangdel na ilog diman ed pasen a sampotay Escolta tan gapoay Isla del Romero, anunotan tora may ambetebetel a kabuasan nen ugaw ni ya panagbaluto ran onlalabas diman no onla rad amesay Uli-Uli.
Akamayamay so nasasabat ton luganan iran sinagoray mababig iran kabayon ankelag a panlugluganan day empliados a mantemtemeg niran onaarap ed opisina, saray sondalo tan opisialis, intsik a singa nagnaonap tan makapalpalek so postura ra, papárin ambelabelat so lupa ra, tan arum ni. Singa abirbir toy pári Dámason akalugan ed sakey a marakep a Victoria,(5) ya mabinbinta tan asilot iray kirep to, balet ta nanpalabasan Jara tan say naabet to natan ya angilugay ed sikaton malikeliket, si Kápitan Tinong ya akalugan ed karetela ya iba toy asawa to tan duaran ának ton bibii.
(1) Jones bridge natan.
(2) Plasa na Cervantes natan.
(3) Lansagan a kawalaan day ankabaleg iran tindaay abel, sapatos, etc. ya pakalmoay marakep tan mabli ran sasaliwen.
(4) Sikatoyay sinmoblay ed Taytay na Barcas, insan natan sinalatay Jones Bridge.
(5) Sakey a klasi luganan.
