Kaepas ed taytay, inian day batik iray kabayo ya amaarap ed pasiaran a tatawagey Sabana. Diad nikawigi wadmay Pabrika na Tabako na Arroceros a dengdenglén so tanol ed panpipitpit day bulong iray bibiin mankikimey. Agto apokpokay impakaimis to ed inpakanunot ton may makmakdón angob na tabako ed Taytay na Barcas, kapag a las sinko lay ngarem a kakaelewan ton lanang nen ugaw ni. Saray nalalagsanan ton masayaksak a tungtongan tan makapalpalek iran salsalitad man ed panaggawaay tabako singa ra intekiab so kanunotan to ed barrioy Lavapies ed España, pasen a gawaay tabako met a masiadoy kakairapan day polis ed panaggulo ray bibiin mankikímey, etc.
Say impakanengneng tod Jardin Botanico pinaer toray maligan pannodnunotan to. Say tukso singa to inbuskag ed arap na matá toy dakep day jardin botanico ed Europa ya anta wala rad bansán agay lay betel a nakaukolay sekder na linawa tan dakel a pilak ta pian onsulming so sakey a bulong tan onbuskag so sakey a rosas; ya aliwan saya labat, no agta anunotan ton patí dakep da met na tanamanan irad arum iran bansán ouleyan, ya mababig so kakaasikaso ra, tan silulukas irad saray totoon maliket a mannengneng. Impaliis nen Ibarray matá to ya inlingay tod kawanan tan diman to anengneng so gendat ya Ibále, Intramuros a kuan, ya aliktob na padir tan aliber met yay maawang tan araldalem a banawang, ya aliling toy marikit ya amespesisaw a nansolong na kawes ni nen bai to ya moda nen saya et ugaw ni.
Wadman met ed saman a bandá so dayat ya ag nagawat na matá so anggaan to! . . .
"Diad biek tonian dayat wadmay Europa," kuanen Ibarra ed nunot ton díli, "Europa tan saray marakep iran bansá to ya ag ira manmemeneng, andi tonda ran manaanap na matúan liket, a lawas iran napnoy seseg ed pananap dav ibolaslás ya anggaman mabetbet met a nasabóng so ilalo ra. . . . ya maliket ira lawas anggan naliliktob iray segsegang! On, diad biek a gilig tonian sankaawangan a dayat so kawalaan day bansán agda
(1) Natan, Plasa Lawton tan Bagumbayan.
(2) Maawang yan tanamanan a kinoral na balatyang ya inletneg na sakey a Gobernador General ed saman a panaon ed pasen natan a manlapod lansangay Arroceros ed arap na opisina ray Bureau na Education ya anggad kaepas ed McArthur Bridge ed petek na Post Office.
