pápauliay nipaakar ed kamarerua, anggamán aasikasoen da met so nipaakar ed laman; bansá ran nayarin ibagan lalon maasikaso nira ed kamarerua nen saramay masiadoy panangipantá ray pangagalang dad saya!..."
Sarayan kanunotan apabtik irad uló to ed impakanengneng tod melag a pukdol dimad Bagumbayan. Saman a palandey a melag a niarawi, ya wadmad abay na pasiaran a Luneta, so makatatawag na imano to natan a kanengnengan toy singa maniisip na aralem.
Nanonunotan to may toon nanlukás na matay pakatalós to, ya angipaliwawad sikatoy maabig tan kaptekan. Tua ta daiset iray inpaseksek tod sikaton kanunotan, balet aliwa ran dengeldengel labat no agta malmalet iran dílin pananisia ya magnayon so katuaan tan kakanaan da tan ag ira apaburarog na marlang a silew na bolaslás na panaon. Saman a too sakey a párin matatken, tan saray bilin to nen manpatanir ed sikato kasakbayay inakar tod Europa, singa toni ra dengdenglen. "Agmo lawas lilingoanan ya anggaman say kakabatan et tawir na amin a toon pinalsa, saray makatatawir saraman labat so walay puso ra!" kuanton impurek. "Ginawak so anggaay nayarian ko ed impangibangat ko met ed sika na inawat kod saray mamaistrok; ontan met ya ginawak so anggaay nayarian ko ed impangarum ko ed kurang na agew na sarayan naaralan ko, tan impangiawat kod mantumbok iran kailalakan. Nepeg mon gaween ya met ed ontumbok irad sika, nayarian mon aliwa labat lan doblian no ag katloan, ta onla kad bansá ran mayaman ed kakabatan." Insan inpatumbok ton makakaimis: "Sikara onla ra dian mananap na balitok; laka yo met ed bansá ra ya mananap na sananey a klasi balitok a nakaukolan tayo. Agmo balet lilingoanan ya aliwan amin a manesiab et balitok." Saman a too ya angibagad sikatoy onia, inatey ed saman a pasen.
Sarayan kanunotan ya ondadalan ed muling to inebatan ton díli ed abeban bosis to na onia:
"Andí, anggan antoni ray linmalabas, manonaan so Bansán nianakan, manonaan so Pilipinas ya anak na España, manonaan so pinagkainan bansán Española! Andí, saray nagagawan igaganggay mauges a kapala-
