ran agda napabanday so galang na Inan Bansán España!"
Ag atawag so imano to ed Ermita - Fenix" ya pinaor ya inmolid bilay ed dapol ton díli; tan nanmaliw a kaabongan a tabla ya pinipintaay ampoti tan inanágan tan inaatepay sim a pinintaay ambalangá. Agto met nilingaw so Malate, ni say kuartel na kabalyería tan saray alolong a pinaor ya akiutok so atep da ya wala rad utel day kapontíyan tan sengesengeg na bua ya ginagawa ran singa bilang obong na sinansakey ya ulóy boleg a manaayam ed sikara.
Say panlugluganan to ag ontutondan manbagtik: no arum makasabat na karomata ya sinagoray sakey onó duaran kabayo ya say mangibabaga lan nanlapod luyag say bistí na kabayon abaká. Say kutsiro ed satan takilingen ton labay a nanengneng no siopay manluglugan ed saman a masilesileng a luganan, balet ta mipalabasan ya andi salitaan tan ag met mangibano. No arum sakey a kariton a sinagoray dueg a matantantay akar to so naabet dad saraman a maawang tan marabok a dalan a nanaames iray sankaktangan ya agew, napatipatan tod satan so tareren a marmaermen tan apasakey na mangipapaakar a mangabkabayod beneg ton may dueg, a kalaok toy makalarakar iran dalig ton may kariton, odinó no arum say magalasagas a dapán na galosa ya ambelabelat so idadalan tod pinasian dabok, tan aboabot na dalán. Diad kaumaan, diad asingger ed panpapamagaan day pagey, wadman iray ayayep a mankakabkab a kalaok daray amusiak a dulakak ya amagamagá ran mantogtoon ed beneg day baka tan dueg, a saraya met anggapoy walad sikara ya andi tonda ran manggagatgat na dika ya ikupitkupit day matá ra no arum, a singa ra bilang nananamen; diad arawi nanengneng iray kabayon kabaiyan a manlukso tan manbagbagtik ya usilusilan iray sakey met a kabayon kalakian a mabilay ya ulat, andukerukey ya ikol tan mapalet a buek, a manpungés tan mandepak a panalimpokapoken toy sapok. Taynan tayoy Ibarra ed panbabaroy ton manmumurekdek onó mantemtemeg ta sankapatnagan ya
(1) Sakey yan manok a nagnap ed krrakpan ta alenleneg ya andigapoy iba to diad tapew na dálin, tan no ompatey, ompawil ya onolin ombilay a manlapod dapol ton díli.
