anggapoy liket ton manamayod maerermen may masayaksak iran nalalabasan to, ag met nanaayat ed samay agew ya agay lay petang to ya panesesiaben toray toktok day kakiyewan tan panbagbagtiken toray dumaralos a singa napopoolay dapan dad petang na dabok anta onman la lantin singa ra nansapatos ed kapal na bukling da; samay agew a napasout toran patondaey bibiin taga uma ya pasiromen toran pilit ed silong na kiew a salisay onó kakawayanan, ya wadman iran mannodnunot na nambabangil a singa mairap ya ipaliwawa tan tálusan.
Ompawil itayo balet ed Ibále kaleganay panlugluganan ton manbagtik a mandakingking, ya aliling toy abuek ed dadalanen toran pasen ya atibtibagkol, diad idalan tod taytay a kawayan onó diad pamakálab tan pamalusor tod niatagey iran dalan.
