Ag alingoy Ibarra: diad samay Victoria wadman a manluglugan si pári Dámaso ya mamapaarap ed samay dílin abong a nanlapoan to.
"Iner so laen yo?" kuanen pári ya tinmepet ed María Clara tan si Tía Isabel ya asabian toran kuanda lan onsapat ed sakey a luganan ya inoukopay parakep a pilak. Say nengneng nen pári Dámaso singa nakukosoy nunot to, tan singa agto nanaasikason tatapoktapoken toy makalkalna so aping nen María Clara.
"Onla kamid colegio ya alaen mi ray kagawaan ko," kuanto nian inmebat.
"Ahaaa. . . . . aha! Nengnengen no siopay mas walay nagawaan to, nengnengen.. ." kuanton singa nalilibang a tinaynan to ramay duaran bibiin aliwan dagdaiset so inkikelawan da. Osdong tan matantantay akar ton anggad inpakasabi tod takayan, insan la sinmegep.
"Mansirmon anganko, ipapatlep to," kuanen Tía Isabel. "Sapat kala María, ta otiagew ita la."
No mansirmon si pári Dámaso onó andi, ag tayo nibaga; balet ta ambelat ira angankon kanunotan so mangogonigoy kalakal to, ta pati lima to agto niderew ed Kápitan Tiago ya akaukolan a tinmalimokor lawari ya ed impanpinsiw to.
"Santiago!" kuay onunaonan inbalikas to; "walay salitaen tan kapilitan; italad opisinam."
Nisegawan si Kápitan Tiago, ag akasel, balet ta tinmolok tan tinumbok to may balbaleg a toon pári, tan inkapot toy pintoy opisina nen kaloob to.
