Legan dan mantotungtong na maamot, nengnengen tayo balet no anto lay agawa nen pári Sibyla.
Sayan makabat a dominiko andi ed konbinto to: kabkabuasan, kayari ton nanmisa, linmad konbinto ray Togiop na papárin dominiko diad Ibále ya walad kaloob ed Puerta de Isabel II onó Magallanes, a sayan pansalat na ngarán tonian pinto milmila ed pansalat met na boleg a manouley ed Madrid.
Agto inasikasoy ambalbalingit ya angob na soklati, ni say tanol na kajokajon tan kalatakat na kuarta ed tesoreria, agto lawari naebatan so magalgalang ya inpangilúgay na pári ya tesorero, si pári Sibyla sinmegep, dinalan toy pigaran koridor tan inpatokpatok ton makalnay punget na lima to ed sakey a pinto.
"Loob kayo!" kuay bosis a makalkalna.
"Paabigen kila komoy Dios," kuay impangibano nen pári Sibyla nen kaloob to.
Wadman a manyodyurong ed sakey a yurongan a baleg a walay benbenay lima, so sakey a párin masiken a mapmabeng tan ampesisaw so kolor to ya singa saramay sasantos ya inpipinta nen Rivera. (2) Nikukondalem iray matá to tan makapakapal iray kirep to ya diad inkasilot dan lanang lalon panmamaliwen dan makmakdem so alimbaway manpapanabos laran matá to.
Si pári Sibyla sankanengneng ton napnoy sibeg, intalikepkep toray taklay to ed sanib na magalang ya eskapulario nen Sto. Domingo, inosdong to, tan ag inmesel a singa manaalagar.
"Ah!" kuanton inngeswa may agmakayari, "say labay da opiraan da ak, Hernando, opiraan da ak ed sayan tatken ko! Say akapaloor na sakit ko sayan bansá, sayan makapataktakot a bansá!"
Intangua nen pári Sibyla ya matantantan iray matá to ya innengneng ed lupa ton may agmakayari:
(1) Nen panaon ya Ulay na Kastila, say petepeteg ya ipapasen a siudad na Manila niliktob na atagey tan makapal a padir a ginawa ya pian ag ira bengalbengat makaloob iray kabusol a labay dan hakalen. Inngaran yan pasen na "Intramuros" tan diay kawalaan day amin lawarin simbaan, saray konbinto, saray opisina na Gobierno tan ayaman day amin a kakastila. Taloray pintó ya lolooban tan sakey ed sikara say asalita dia ya manngaray Puerta de Isabel II onó Magallanes.
(2) Sakey a balitadon pintor a kastila.
