"Antoy apaabig yo ey?" kuanton tinepet.
"Ompatey! Ay, wala ni sirin so nagawaan kon arum? Masiadoy paniirap ko, balet ta ..... dakdakel met so apairap ko. . . . ! manbabayar ak na utang ko! Sika ey, antoy itsuram? Akin et linma ka dia?"
"Linma ak dia ta salitaen ko may inbilin yon impagawad siak.”
"Ah! Anto ey?"
"Psh!" kuanton inmebat a singa bilang walay agto apaknaan, tan inyurong ton inarap tod biek so lupa to ya napnoy panmurmura, "nilalastogan da itayo labat; si Ibarra sakey a tubonbalon maaluar, walay uló to, balet ta isip kon maong ya ugaw."
"So pakaisip mo?"
"Ginmapó laray irangan kalabian."
"La? Ya panon?"
Si pári Sibyla tinongtong tod antikey a salita so agawa ed pári Dámaso tan si Crisóstomo Ibarra.
"Sakey ni," kuanton angisumpal; "si Ibarra asawaen toy anak nen Kápitan Tiago ya binangatan day agági tayo ed colegio, mayaman, tan agto anganko labay so manggaway dakel a kabusol ton makasengeg na pakabalangan toy kayamanan to tan liket to."
Tangertanger si mangiinagem ed piabobon to.
"On sikato met so isip ko. . . . . No ontay asawa to, insan ontan met so katolangan to, isipen ko ta sigpot a walad silong na pakauley tayoy laman tan kamarerua to. Et no andi, lalon abig no ontongangán omparungtal a busolen to itayo!"
Ninengneng nen pári Sibyla ya nikelawan imay masiken.
"Kaabigay masantos a Togiop tayo so labay kon ibaga," kuanton singa nalelengat so linawa to. "Mas lablabayen ko lay balawen onó paugesen da itayo nen say inaambagel tan alablabas a dayew day kakaaro.. tua ta babayaran ira."
"Diad isip yo sirin. . . . ?"
Ninengneng ton may masiken a maerermen.
"Tantandaan mo ya!" kuanton inmebat a marmairap so kalilinawa to. "Say pakayari tayo magnayon
a legay walay pananisia ed sikato. No paugesen da ita-
