hin sako basi ilabog ha dagat, bisan pa gamitan ko
hinin akon ngatanan mga brilyantes, sugad hin lasti,
pagpabug-at.
—Urusahon nga tulos!— nagmugo hi P. Irene, nagtitinawa; —ta, iton mga panhalin ngan tibway nga pagpusil?
—Ada, basi ini nga tuna masilhigan ngan makuha an maraot nga binhi...
—Ngayan! Nagngungutngot ka pa han pagtapua ha imo han mga tulisan, ngan hunahunaa nga maupay na la kay waray ka arui hin darudako nga lukat, o waray kuhaa an ngatanan mo nga alahas... Hombre, ayaw pagsugad hito!...
Hi Simoun nagsinumat nga gintapo hiya hin usa nga hugpo hin mga tulisan ngan katapos ha iya panagtaw’a ha sakob hin usa kaadlaw binuhian hiya basi makagpadayon han iya lakat waray ha iya inaro nga lukat kundi an iya la duha nga magpakaruruyag nga rebolber Smith ngan han duha kakaha nga karatsutso hin bala nga iya dara. Nagsiring pa hiya nga an mga tulisan nagtugon pangomusta kan Su Excelencia, an Kapitan Heneral.
Salit ngan tungod kay hi Simoun nagsinumat nga an mga tulisan sangkap hin mga eskopeta pusil ngan mga rebolber, ngan makuri in usa la nga tawo makadto ha ira bisan pa armasan, diri makakapangalasag, hi S. E.. basi an mga tulisan mga sano buwas diri na makaarog hin armas, nagsusugo na unta hin usa nga bag-o nga decreto mahatungod han mga pistolas de salon.
—Sayop ito, sayop!— nariwa hi Simoun; —para ha akon an mga tulisan amo an labi kadungganan nga mga tawo dinhi hini nga tuna; amo la an namamagpakabuhi pamiling han ira bugas ha tultol nga pamatasan... Hunahuna niyo kun say ha akon nakasakob... tabi, hi ikaw pananglit, binubuhian mo ako hin diri mo kuhaon bisan na la an katunga hinin akon mga alahas?
Hi D. Custodio nagyayakan na unta pagriwa; adto hi Simoun uraurag ud man hin kawaray batasan, usa nga mulato amerikano nga nahusa la kay sangkay han Kapitan Heneral hin pagpakaraot kan P. Irene. Kundi kamatuuran man liwat nga diri hiya binubuhian ni P. Irene hin sugad hadto kagutiay nga kukuhaon.
—An karat’an,— nagpadayon hi Simoun, —diri
