P. Sibyla ngan kan P. Irene. Say na magawás yana
an kabahulán. Ngaduhá namag-andam.
-An pangaro han mga estudyante nga matugutan pagbukás hin usa nga Academia de Castellano,- binmatón an Sekretaryo.
Inabat in kilos dida han ngatanán nga nakadto ha sala ngan katima hin panaggisirusiplatay, say nira tinadong hin pagtinutók an Heneral pag-ináw kun anó an bubuhaton. May adá na uunóm kabulan nga adto nga pangaro naghihinulat han paglaladngan ngan nagin-usá nga casus belli ha sakób hin usa nga ginkakatarampuhan. Hi S.E. nagtitinamod daw diri buót nga hisabután an iya mga panhunahuna.
An kamingaw bagá nagtitikamakahurulop ngan sinmabót an Heneral.
-Ano an imo nahuhunahuna? -ginpakianhan an Hataas in Katungdanan.
-Ano ngani in mahuhunahuna ko, Sr. Heneral,- binmatón an ginpapakianhan, pinmakuró han sugbong ngan hinmiyom hin kanán nagtuturaw; -ano akon mahuhunahuna kundi nga iní nga pangaro matadong, gimatatadungi, ngan nahapapausa ako nga nahagusan na hin unóm kabulan an pagpinanhunahuna han katuhayan!
-Tungód kay may gintatara nga mga kaulangan, -nagbatón hi P. Sibyla hin waráy kaikág ngan kinipot hin gutiay an mga matá. Binmalik pagpakuró han mga sugbong an Hataas in Katungdanan daw sugad hin waray niya hibabaruí kun ano adto nga mga kaulangan.
-Labot la han kadiri pa igo han mga panuyo,- nagpadayon an dominiko, -labot la han kamay-pagtalapas han amon mga katadungan.
Hi P. Sibyla waray pagpasipara pagtapos ngan sinmiplat kan Simoun. -An pangaro may ada kinaiyá nga angay pagtahapan hin maraot, tinapusan hini nga nakigbalyo hin siplat han dominiko.
Ini nagpinirukpirok nakaduhá. Hi P. Irene nga nakakita sinmabót nga an iya inuugupan nga asunto haros pirdi na: kinukuntra ni Simoun. -Usa nga mamingaw nga pagribók, usa nga paggubót ha tinimbrihan nga papel, dinugangán ni P. Sibyla.
