Camorra; -kikitaon ta anay kun hino in may maupay
nga kamaoo!
Dida hini hi P. Fernandez nga nagtitinawa la hamtang namamaglantugi, nagyakan: ngatanán namati kay maaram hirá nga maupay manhunahuna.
-Ayaw ako kasinahi, P. Sibyla, kun tumipa ako han imo pangatadungan dida hini nga bagay, kundi urusahon inin akon palad nga unob ako nga iginkakapingki hinin akon kabugtuan. Nasiring ako nga diri kita angay manhunahuna hin maraot. An pagtutdo han kinatsila mahihimo hin paghitugot hin waray kataragman, ngan basi diri mahabutang nga usa nga pakalupíg han mga magturuon patok han Universidad, angay kita an mga dominikos magtalinguha ngan say an siyahan malipay nga itinutugot; amo ito an politika. Kay ano nga unob kita makikig-inawáy han bungto kun ha katapusan kita amo an gutiay hira an damo, kun kita say nagkikinahanglan ha ira diri hira ha aton?... Bay'i anay, P. Camorra, hulát anay!... Itugot ta nga yana an bungto maluya ngan kulang hin hibaró, ako amo itó iton akon ginmamatuuran, kundi diri na masusugád hito mga sano buwás. o isangbuwás. Buwás o isangbuwás amo na hira an magiginmakurukusóg, manhihibaró na kun anó an maupay nira ngan diri kita makakapugóng, sugad nga diri mapupugóng nga inin kabataan, pag-abót ha panuigon, manhibaró han kasayuran han damo nga butáng.. Salit nasiring ako, kay ano nga diri kita magpahimulos hinin kadiri pa nira pagsabót, hin pagbalhin hin paagi ngan ipasikad ta an aton politika ha tungatunga nga masarig, dayon ngan matadong, pananglit, diri an kawaray sarabutan. nga tungatunga? Kay waray na masugad han pagkamatadong, unob ko ini ginyayakan ha akon mga kabugtuan kundi diri ha akon natuod. An indiyo, sama han ngatanan nga bungto nga batan'on pa, nagdadayig han pagkamatadong; naaro han sirot kun nakakasayóp sugad man nahahangit kun an sirot diri kaangayan. Tultol an pinangangaro? Itugot, tagan ta han ngatanán nga liburán nga inuungara, mga sano pangunguyamán ito: an mga batan'on may kinaiyá nga kahubya ngan an nakakapakurimot ha ira amo an aton pagriwa. An aton ginkakasangitan ha ira ha pagkatalahuron, P. Sibyla, upós na; pag-andam kita hin lain, pananglit, an
