ginbubutangbutangan hin pagbagisbagis hin mga trianggulo dida ha ostiyas, dará na han iya katiáw ha Astronomiya, ngan tungód liwát kay sinisiring nga waray na tuguti pagmisa; damo na liwát in sinmabot nga baga tirhi ha iya balatian ini nga kinaadman nga iya igintututdo;kundi ini nga arong mga sumatsumat la, mga katiawán ha iskwilahan ngan ha tuluuhan ngan masayón la an kasayuran, diri la tungod kay an mga pagaradman ha pisika buruhaton gud nga ungód, mga butáng nga pagkikit'on ngan pagtutukibon, hamtang an iya dig-on aada ha mga butang nga pilosopika, tugá gud la nga pagbanabana, pagpainuino ngan pagpasantop, layón na man tungod kay, salit kay dominiko hiya, mahigugmaon han maupay nga bantog han iya Orden, diri niya mahihimo in pagsaho hin usa nga kinaadman nga waray pa ilandaw hin mausá
han iya kabugtuan, -amo hiya an siyahan nga diri natuod han Quimica ni Sto. Tomas! ngan kinuhaan hin damo nga kabantugan han mga Orden nga kaaway, sidngon ta na mga kasibang.
Amo ini an propesor nga hadto nga aga, katapos pagpasalista, napapagsubay han leksiyon hin sinaulo, waray kulang han letra, ha kadam'an nga magturuon. Nagtikáng panhuni an mga ponograpo, may naghihikaupáy, may naghihikaraót, may nag-uurung-uróng, nagpapadirudikta. An waray burong tinatagan hin maupay ngabagis, an magsayóp makatuló maraot nga bagis.
Usa nga batan'on nga matambok, kapíraw an na- wóng, unat ngan bahól an buhók bagá in idyok, naghihinuyam nga haros mawangi an apapangig ngan nanngungunát han mga butkon sugad hin nakadto ha higdaan. Hinkit'an han propesor ngan pinakalasan:
-Uy! kapiraw, aba kosa? Peresoso tambyen, seguro diri maaram nang leksyon, ha?
Hi P. Millon, diri la kay natawag hin tu han iya mga tinutduan kay batasan ini hin usa nga maupay nga prayle, kundi ginhihimangrawán pa liwat hin linangka, batasan nga hinaaraan han propesor pa hiya ha Canones. Kun an Reverendo magpahaubos ha usa nga magturuon o han mga birilhon nga paglaladngan han mga Concilios, butáng ini nga waray pa katuháy bisan kun ginlantugi na hin makusóg ngan maiha.
An iya pakalas waray pakasingit han klase, makaliliaw ngan damo in nanhikatawá: amo adto an ha
