adlaw-adlaw. Kundi an muok waray hikatawá; inmupsutan pagtukdaw, naglusgos han mga matá ngan, daw makina de vapor nga nakapalakat han ponograpo, nagti kang hin pagsubay han leksiyon:
-"Sinisiring nga espeho, panganinuhan, an ngatanán nga pinainggat hin mahamis kay basi, dara han sulhog han silaw, manganinaw an mga dagway han mga butáng nga igkaatubang han mao nga bayhon, tungod han mga kahimtang kun ano ini nga bawbaw nga nahimo, an mga espeho ginlalainlain: may espeho nga metal may espeho nga salaming....."
-Ukoy, ukoy, ukoy! binmul-ang an propesor; Jesus nga palapala!... Nasiring ka nga an mga espeho may metaliko, may salaming, ha? Kun pakitaon ko ikaw hin kahoy, an kamagong, pananglit, nga pinahamis hin mainggat ngan binarnisan, o usa kapinit nga marmol nga itom nga maupay an kapainggat, usa kabagnos nga asa batse nga nanlaladawan han dagway han mga butáng nga igkatungod, mga ano man nga klase ito nga mga espeho?
An ginpapakianhan, tungód ada han kadiri maaram bumatón o kadiri pagsabót han pakiana, nangalinggawas, nagpakita nga maaram han leksiyon ngan nagpadayon pagparaputdapót:
-"An mga siyahan nahihimo hin lata o hin usa nga butáng nga ginkakasalakutan han magkalainlain nga metal, an mga ikaduhá hinimo ha salaming nga pinahamis hin mainggat an magkalyo nga bayhon, usa hini pinaduktan hin sinaktan nga estanyo.'
-Tun, tun, tun! Diri ito amo; nasiring ako Dominus vobiscum ngan nabaton ka requieskat in pace.
Ngan an buutan nga propesor binmalik han pakiana, ha linangka, sinaktan hin cosa ug mga abá ha ikinagirugihot.
An makaluluoy nga batan'on waray pakakatuháy: nagruruhaduha kun iuupód ba niya an kamagóng dida han mga metál, an marmol didto han mga salamíng ngan an asabatse sugad hin neutro ngada han pagdiktahi ni Juanito Pelaez, an iya kasapit, hin palikaw la:
-An espeho nga kamagóng tampo han mga espeho nga kahoy...
An turahós sinmubád la ngan an katunga han klase nagpatay hin katatawa.
