pasaylo... waray ako kalibutan nga ikaw ngayan. Komusta
hi imo bata?
Hi Isagani rinmayhák ngan nakahunahuna nga magmamaupay an lakát han asunto. Iya ginasuyan hin laktod han nahinanabó, iya gin-inaw-inaw an abót han iya mga pulong. Hi Sr. Pasta nagpinamati la anay ha siyahan ngan, bisan kun sayod niyá han mga talinguha han mga estudyantes, nagpaka-waray niya kalibutan dapit pagpakita nga waray niya labot hadto nga binatabatá nga buhat; kundi han kasayod han inuungara ha iya ngan pakabati nga hinngangaranán an Vice Rector, mga prayle, Kapitán Heneral, proyekto ug mga ibá-ibá pa, nagtikáng paggum-ot an iya kahimo ngan ha katapusan nagyakan:
-Amo ini an tuna han mga proyektos! Kundi, pagpadayon, pagpadayon la.
Hi Isagani waray kahulop; iya ginhimangrawán han katuhayan nga igagawad ngan iya tinapusan nga an mga batan'on natapod ha iya, kan Sr. Pasta, nga maabuyon ha ira kun pananglit hi don Custodio pumakiana ha iya, kay amo an ira ginpapamulat. Hi Isagani waray pagpasipara pagsiring nga sagdunán hi don Custodio, tungod han kahimó han abogado nga nagmumud-ot.
Kundi hi Sr. Pasta daan na may ginhuhunahunaan nga bubuhaton nga amo an diri pag-irog didá hadto nga asunto hin bisan la anó nga hitsura; kamanaragdon o kasaragdunan. Sayod hiyá kaupay han nahinabó ha Los Baños, maaram hiya nga may duduha nga pundok ngan hi P. Irene amo la an manunubos didá han pundok han mga batan'on, ngan diri man liwat amo an nangaro nga an espedyente itapod han Comisión de Instrucción Primaria, kundi balikád lugód. Hira F. Irene, P. Fernandez, an Condesa, usa nga komersyante nga naglalaom nga say papalitán han mga kagaramitan han bag-o nga Akademya ngan han hataas in katungdanan nga nagpahayag hin kadam'an nga reales decretos, nagdadaog na unta, kundi hi P. Sibyla, nga karuyag nga matagan hin panahón, nahanumdom han Comisión Superior. An bantugan nga abogado maaram hini ngatanán ngan iya la ini ginhihilom; salit han pakatima ni Isagani pagyakán, naghunahuna hin paglipong han batan'on iginpaagi ha mga pulong nga pag-alinggawas, pagsamok han asunto ngan pagdará han himangraw ngadto ha ibá nga butáng.
