-Waray ruhaduha, -nganiya pa; -damo in mga mediko ngan mga abogado kundi diri kay nagsusubra, kay may adá mga bungto nga waray; kundi, kun nagsusubra kitá ha kadamo nagkukulang kitá ha kalidád. Ngan tungod kay diri mahihimo hin kadid'i han pagkabatan'on nga mag-arám, ngan dinhi ha aton waray ibá nga karrera nga sadáng pagkuhaon, kay anó nga pababay'an ta nga magkarag han ira panahón ug mga kabudlay? Ngan bisan kun an pagtutdo dako an kakulangan damo gihapon an namamag-abogado ngan namamagmediko, ngan kun mamamay-adá na man la, kay ano nga diri kita mamay-adá hin mag-upay? Ngan bisan pa liwát, kun himuon ta ini nga tuna hin mga parauma, tuna hin mga magburuhat, igdiri ta dinhi an mga makinaadmananon, waray ko kinikita nga maraot nga ini nga mga parauma ngan mga magburuhat matutduán, matagan hin hibaró nga ipakakagpakatakós pagpakaupay ha ira ngahaw ngan pagpakaupay han ira mga buhat, nga mahamutáng ha pakasabót hin damo nga mga butang nga yaná diri nira hinsasabután.
-Ah, baá, baá- nagyakán an abogado nga nagkirikot ha hangin han tinitigbaw nga kamot dapit pagpaharayó hin mga panhunahuna nga dinmangóp ha iya: _basi magmaupay nga parauma diri kinahanglan in mga retorica. Mga inóp, mga aninaw, mga himuhimo! Ano na! Karuyag mo in maupay nga sagdon? Binmuhát ngan agbayán ha sugbong hin kanan mainugupon, nagpadayon:
Tatagan ta ikaw hin maupay nga sagdon kay nakita ako nga listo ka, inin akon sagdon diri makakarag. Nagtutuón ka pagkamediko? Kun amo, pag- arám kun inuunano an pagbutáng han mga birma ngan pagpatukób han linta ngan ayaw mga sano pa man pagpasipara pagpakaupay o pagpakaraot han kapalaran han imo mga igkasí. Makatapos ka na ngani hiton imo carrera, pakasál hin usa nga babayi nga may katigayunan ngan makidiyós, pagtalinguha panambal ngan sukót hin maupay, paantaw han bisan la ano nga mahananabi han kasahiran nga kamutangan hini nga tuna, singba, kumpisál, kumulga kun an ibá amo man an bubuhaton ngan makita ka nga unina imo ini igpapasalamat ha akon ngan tutungbalayon ko ikaw kun mabuhi pa ako. Panumdom gihapon nga an santop nga kaluoy natikang ha kalugaringon; an tawo diri angay
