-Kairó hitó nga batan'on!... Kun ngatanán manhunahuna ngan kumiwá sugad ha iya ano in kadiri... kairó man! Kairó ni Florentino!
Han gabi hadto nga Sabado hi insik Quiroga nga naghihingyap hin pagtukod hin usá consulado han iya nasod, naghahatag hin panihapon didto ha igbaw han iya dako nga bazar nga aada ha Escolta. An iya panagtawo gindamuan hin sumasaka: mga prayle, mga empleado, mga militar, mga komersyante, an damo niya nga mga suki, mga kabakás o mga padrino, nakadto; an iya tindahan amo in kinukuhaan han mga kura ngan mga kombento han ngatanán nga kinahanglanon, nakarawat hin vale han ngatanan nga empleado, may adá niya mga unob tinapuran, magpakiaangayon ngan mga buhatan. Bisan ngahaw an mga prayle diri nanhihikaawod pagpakita han kadam'an didto ha tindahan hin tigmaiha, sugad man didto ha sag-od pakighiniruhimangraw.
Salit hadto nga gab-i an ruwang may dagway nga urusahon. Punó hin mga prayle ug mga empleado nga nanlilingkod ha mga lingkuran nga Viena ngan mga bankuay nga kahoy nga maitóm kundi marmol an bawbaw, nga tikang ha Canton, ha atubangan hin mga masita nga maglado, namamag-urugyag hin tresilio o naghihiruhimangraw man la, ha ubos han mapawa nga suga tikang dida han mga binulawanan nga surugaan o dida han maarupaóp nga silaw han mga ininsik nga parol nga nanlulutód kay mga dagway hin isda nga sinabngan hin haglaba nga ikog. Dida han mga bungbong nagkakasalamok, hin diri angay nga pagkasalakot, in mga paisaje nga maghilom ngan magtagom, nga buhat ha Canton ngan Hong Kong, may mga istampa, nga maglabád an tina, hin mga odaliska, kababayin'an nga haros mga lubas, mga istampa hin Cristo nga babayin'on, an pagkamatay han baraan, ngan han kanán makasasala, nga binuhat han mga hudiyo didto ha Alemanía kay ibaraligya ha mga tuna nga katoliko. Diri man liwát didto nagkukulang in insik nga mga istampa nga binuhat ha pula nga papél, nga nalaladawan hin tawo nga nalingkod, talahuron an dagway, buutan
