Quiroga; adto nga empleado bantog ha Manila nga listo!
Iton ngadto ha unhan, adto nga may mamará nga paniplat ngan diri minangnuán itón bigote, amo ito an empleado nga sinisiring nga amo an labi nga may pagkatakos kay
nagahóm hin pagyakan hin maraot kontra han pagbaligya
han mga bilyete han loteriya nga binubuhat nira insik Quiroga ngan hin usa nga hataas in kamutangan nga senyora
dinhi ha Manila. Matuod man gud, diri na man an katungá kundi an duhá hin tuló kabahin hitó nga mga bilyete
napakadto ha China ngan an gutiay nga nahabibilin ha
Manila iginbabaligya hin may patubo nga kahati. An
takós nga senyor may adá gud pagmatuod nga mga sano
hiya an magdadaóg han primer premio ngan nangangalás
nga igkita hin sugad nga mga paagi.
An panihapon nag-iikatarapós na. Tikang didto ha komedór naabót ngadto ha uswag in bahin han mga pamulong, katatawa, an mga sagbang, harahara... An ngaran ni Quiroga nakakadamo na hibabatií hin liwatliwat, sakót han mga pulong nga konsul, pagkaturupong, mga katadungan...
An tagbaláy nga diri nakaon han mga kaluto ha Europa nag-inilób la hin pag-ininom hin talagsa, tinag-usa kakopa, kadungan han iya mga kumbidado, nagsaad hin panihapon kadungan hadton waray pagpakatangka ha siyahan nga lamisa.
Hi Simoun inmabót tima na paninihapon ngan nagyiyinakan didto ha uswag katampo hin mga komersyantes nga nangurutob han maraot nga lakát han negosyo: ngatanán waray upay, nahauukóy an pagpakabuhí, an sukli han salapi tikadto ha Europa hataas kaupay; an alahero pinangangaruan hin kalambragan o gin-iidug-idugan hin mga paagi man gad pa isumat ha Kapitán Heneral. Ha tagsa nga paagi nga ira iginpapakita binabatón ni Simoun hin tawá nga badyangás ngan waray haros! Ha linuróng!, salit in usa nga nauurit na, nagpakianá kun ano man an bagá ha iya.
-An bagá ha akon?-nagpakiana;-pag-adman niyo kay ano nga an iba nga nasod naghihimudlay ngan pagsubdan niyo.
-Kay ano nga namamaghimudlay, senyor Simoun?
Hi Simoun pinmakuró han sugbong waray bumatón.
-An mga buruhaton ha puwerto nga say nakakabugat han komersyo ngan an puwerto nga diri natitíma!- nagpahungáw hi don Timoteo Pelaéz,-usa nga panapton
