Amo hi Paulita Gomez, an himiste ha ngatanán nga himiste nga inuupdan ni Isagani; ha luyó nira nasunód hi donya Victorina. An daraga nasirang hin kahusay; an ngatanán nanhihipaukóy, nalulubag an mga liog, nanhihiurong an karukayakan, ginlalanat han mga paniplat ngan hi donya Victorina ginsasaurog hin matinahuron nga pakiangay.
Hi Paulita Gomez nakakasul-ot hin gimamahali nga bado ngan kandungga nga pinya, nga lain han iya isinulot hadto nga aga pagsingba ha Santo Domingo. An masilhag nga panapton nga pinya nakakahatag hin kahingpitan han iya matahom nga ulo, ngan an mga indiyo nga nagkikitá ha iya igintatanding hiya han bulan nga ginbubutnga hin magbuság ngan magnipis nga dampog. An saya nga sida nga limbaon an tina, nga kinakaptan ha turupong nga piligis han mahusay nga kamót, nakakahatag hin hadianon nga tindog han iya matadong nga lawas, ngan an mga kiwá nga pinaaangayan han paggasád ngan pagparayaw. Hi Isagani bagá waray aayón; nauurit han kadam'an nga matá, han damo nga mga usyuso nga nagkikinulaw han katahuman han iya higugmaon; an mga paniplat bagá in mga panikas; an mga hiyom han daragá bagá in mga paglingo.
Hi Juanito han pakakitá ha iya dinmugang hin kabuktot, ngan sinmaludo; binatón hiya ni Paulita hin hinubya, gintawag hiya ni donya Victorina. Hi Juanito amo an ayón, mauruupáy niya kan Isagani.
-Por bida, por bida nga babayi!-nagkakababa hi P. Camorra nga nahamumuang.
-Palipak, padre, say kulituga iton imo tiyan ngan ayaw ako say asahi!-an pulong ni Ben Zayb nga nauurit.
—Por bida nga babayi, por bida!— binmalik pagsiring; -ngan say pa ba nobyo an estudyante nga akon iginkabulos hin tikwangay! Salamat kay diri tagá didto hiton akon bungto!- binmalik pagyakán nagliliningi kay ginsisinunod niya han paniplat. Nakadamo pag-iburulag han iya mga kaupdanan kay karuyag magsinunudsunod han daraga. Kakuri masagdunan ni Ben Zayb nga diri umasa!
Hi Paulita nagpadayon hin lakát ngan hinkikit'an an iya maghusay nga mga lirik ngan han iya gutiay nga ulo nga inaydan hin maupay an buhók nga naangay la han iya pangiwakiwa.
