An aton magparasyada nagpadayon man han ira tadong kundi lakip an mga panhayhay han prayle-artilyero, ngan inmabót hirá ngadto hin usa nga tindahan nga gintatarambakan hin mga magkirita nga gilayón nagbuhág paghatag ha ira hin wada.
Asya in usa nga tindahan hin mga tawotawo nga kahoy, nga hinimuan la didto, nga nanlaladawan han ngatanán nga kalawás, ngan dagway, tindog, tulin ngan buhat dinhi ha Kapurupud'an, mga indiyo, kakatsilaan, kainsikan, mga mestiso, prayle, klerigo, empleado, gobernadorsilyo, estudyante, militar ug iba pa. Tingali an parapanhimo may pagkaruyag han kapadian, an mga piligis han ira sutana bangin amo in nahaaangay han iya mga pagpaanuano han panhimo, o tingali an mga prayle, tungód han damo nira nga hintutunguran ha sakób han katilingban nga pilipino, say naguóp han ulo han eskultor, o kun ano la nga hinpapatungdan, an mga tawotawo nga padi amo an damo, mag-upay an kahimo, humanhuman, say iginpakita an magpakaaramdok nga higayón han ira kinabuhi, balí han ira binubuhat didto ha Europa nga hira iginpapakita nga nanhihingaturóg ha bawbaw hin barril hin vino, o nag-uurugyag hin baraha, nag-iirignom, namamagpabundis ha tangkaan o nanngangaham han bayhon nga mahamis hin usa nga daraga. Diri; an mga prayle ha Pilipinas ibá: mga himiste, garbuso, mag-upay in sul-ot; mag-upay an kaarót han linitob nga buhók; an kahimó maupay ngan buutan; an paniplat mapinairon, an pamayhon kanán baraan, may tiná nga limbaon ha bayhon, may tungkod nga parasan ha kamót ngan may sapatos nga tsarol ha tiíl nga nakakaaghat hin pagdayig ngan pagbutáng ha ira ha sakób hin urna nga salaming. Diri hirá susgaranan hin kalamót ngan kawaray kasadangan sugad han ira kabugtuan didto ha Europa; hirá, an ha Manila, dará an basahán, an krusipiho ngan an lukáy ha pagkasakit; diri hirá nanhaharók han mga tagá hurón nga kababayin'an, an ha Manila napapapanharók, hin inungod, ha ira kamót, han kabataan ngan han mga tawo nga hamtong na, nga nadukó haros naluhód; diri an aparador nga himusán hin sud'an ngan an komedor nga tugób hin karan'on an ira hinmumutangán sugad didto ha Europa; ha Manila say nira an pangaradian ngan an lamisa nga barasahán; diri prayle nga makililimos nga nagtatawag ha tagsa nga purtahan han mga baláy upód
