an iya asno, ngan daradara in sako nga surudlan han
limós, an prayle ha Pilipinas nagsasabrag hin salapí ha
magpakaluluoy nga mga indiyo...2
-Kitaa na niyo, aadi hi P. Camorra!- nagsiring hi Ben Zayb nga waray pa kahahawhawi han tsampan.
Ngan tinutudlok in ladawan hin usa nga prayle nga malapis, nga mahinud-ungon, nalingkod ha atubangan hin lamisa, an ulo nasarig ha iya palad ngan bagá nagsisinurat hin usa nga wali. May usá nga kingke nga amo an iya sugá.
An paghitipa hini nga ladawan han taglawas ginkatatawaan hin damo.
Hi P. Camorra, nga nahangangalimot na kan Paulita, sinmabót han tuyo ngan binmulós pagpakiana:
-Ngan kan kanay man ladawan inin iini nga hinimo, Ben Zayb ?
Ngan magtinawa han iya tinaw'an nga kanán gango.
Asya in usa nga tigurang nga babayi nga butá an luyo nga matá, nalulugayán, nalumpagi ha salóg sugad han mga diyós han mga indiyo, kay namamalansa. An garamitón maupay an kasubád, tumbaga, an mga baga oropel ngan an asó linubag nga buringón nga gapas...
-Anó, Ben Zayb, diri lurong an naghimo,-nagpapakianá, nagtitinawa, hi P. Camorra.
-Waray ngahaw ako pakakasabót hito!- nagsiring an peryodista.
-Kundi, punyales! diri ka nakita hitón ngaran La Prensa Filipina (An Pamatikan ha Pilipinas)? Ito nga garamiton nga iginpapalansa hitón lagás, prensa dinhi an ngaran.
Ngatanán nagkatatawa pati hi Ben Zayb nahakatawá hin ungud-ungod.
May duduha nga sundalo han Guardia Civil, linitrahan civiles nanhihibutáng ha luyó hin usa katawo nga ginapos hin bahól nga kadina, ngan an nawong natatahuban han kalo; an ngaran El pais del Abaca 3 ngan bagá gindadará ngadto pagpusil.
Kadam'an han mga bisita waray hiaayuni han mga tawutawo. Namamagyinakan hin mga lagdaan han arte, nangingiliw hin mga pagkaangay-angay; may usa nga nasiring nga adto nga tawutawo diri pipito in ulo, nga an bayhon kulang hin uusá pa nga iróng, kay tutuló la an nakadá, salit nakakahatag kan P. Camorra hin pamuru
