hin pulong nga kanán hiara:
-Oy, mister, kay kitá man la dinhi ngan diri kami mga indiyo nga masayón la tumuod, matugot ka nga ipakita ko ha ira an limbong ha matá ? Maaram kami nga aadá gud la ini ha pagkitá, kundi tungod kay hi P. Camorra diri natuod.
Ngan nag-ilalakbay han barál waray na pag-agi han purtahan, hamtang hi P. Camorra nagpipinamaribád nahadlok nga bangin man gud magmatuod an siring ni Ben Zayb.
-Anó in diri, senyor; nagbatón an Amerikano;kundi paghirót la nga diri ako kabuungan, ha?
An peryodista nakadto ha bawbaw han tarima.
-Matugot ka?- nagsiring.
Ngan waray na paghulat han batón, kay nahadlok bangin hi M. Leeds diri tumugot, winalis an mantel nga lana ngan namiling han mga espeho nga, iya ginlalauman, nakadto han mga til. Hi Ben Zayb nanampalas, inmisol, binmalik pangaham han duhá nga kamot ha sirong han lamisa, iya iginwasiwas; waray may hin kahamán. An lamisa tutuló an tiil nga puthaw nga mga gamáy nga nahauusok ha salóg.
An peryodista naniplat ha ngatanán nga daplin daw may adá ginbibiling.
-Hain na an mga espeho?- nagpakiana hi P. Camorra.
Hi Ben Zayb nagpipinangusisá, nanhihiram han lamisa, winawalis an tabón ngan danay humapyod han agtang dapit may ginpipinanumdom.
-May nawawará mo?- nagpakianá hi Mr. Leeds.
-An mga espeho, mister, hain na an mga espeho?
-An imo ambot kun hain, an akon aadto ha Fonda... karuyag ka manganinaw? Bagá hin-apikihán ka, ginduduas ka.
Didá han mga magkirita, tungód han mahinay nga intrimis nga pulong ni Mr. Leeds, damo in nanhikatawá kan Ben Zayb nga pinmihaw ngan binmalik ngadto han iya lingkuran nangutab:
-Diri mahihimo; makita kamo, diri magpapadayon kun mawaray espeho; babalyuán ito niya unina hin lamisa...
Ibinalik ni Mr. Leeds an dugnit nga lana pagtabon han lamisa ngan atubangón an mga dungganan nga magkirita, nagpakiana:
