gutiay la igpusilay kay ginhubad hin diri amo an ngaran
hin usá nga tenor; usá nga awaanon iginbutáng
dayon ha usá nga artikulo ngan ginngaranan hiyá nga
ignorante, hiyá nga amo an siyahan nga ulo nga nanhuhunahuna
ha Pilipinas! Diri harumamay an iya pangalawkalaw!
Diri makulang hin napulo kagpito nga artikulo
an ginsinurat ngan nagpinalipali pakisagdon hin napulo
kaglimá nga diksyonaryo. Ngan dará hini nga napadig-on
nga hinumduman, an makaluluoy nga Ben Zayb naghihinay
na pagpitád han kamót nga timga, diri namon
sinisiring nga tiil, tungód han diri pagsubád kan P. Camorra
nga nasiring nga say iginsusurát ni Ben Zayb
an mga tiíl.
—Kinita mo na, Kiko, -nasiring hi Camaroncocido; —an katungá han mga tawo napakanhi kay nagsiríng an mga prayles nga diri magpakanhi, ngan an luyó nga katungá tungod kay nasiríng hirá: igindidirí han mga prayle? ta, kay bangin may sadáng pag-adman. Tuod la, Kiko, an imo mga programa maupay, kundi labí kamaupay an pastoral, itó ngani nga waray may nag-basa bisan hino!
—Amigooo! An bagá ha imoo, nagpakianá nalilisang hi Tio Kiko, -tungód hinín pakigtigi ni P. Salvi, mga sanooo, makukuhaan ako hin trabahooo?
—Bangin la, Kiko, bangin la,- binmatón an usá nagkikinita ha langit;- inín salapí nagtitikáng hin pag-kulang...
Hi Tio Kiko nagngurób hin pirá kapulóng nga diri surusumpay; kun an mga prayle umirog na hin kamagpasarangyaw hinín mga teatro, hiyá masulód man kaprayle. Ngan katima panamilit didá han iya amigooo linmakat nag-inubo ngan nagpipinatunog han iya mga pisos.
Hi Camaroncocido, dará han iya nababatasan nga diri kaalantad, nagpadayon han paglinakat ngadto, nganhi, nagdadanas han tiil ngan pinipiráw an paniplat. Say nakaaghat han iya pangulaw an pagkaabot hin mga bag-o nga nawóng, gumikan ha magkalainlain nga daplin ngan namamagpasirusinyas upód in kiró ngan usáhay mga ubó. Amo pa hiyá makakitá ha sugad nga higayon hin sugad nga mga tawo, hiyá nga nakilala han ngatanán nga kahimo didá ha siyudad ngan han ngatanán nga bayhon. Mga tawo nga magsiróm an nawóng, mga
