Hi Simoun waray nga tuód pumakadto ha teatro. Tikang ha ikapitó an takna hadto nga gab-i linmakát didá ha iya baláy, lisáng ngan maraot an buót; an iya mga suruguon nakakitá ha iya nga sinmaká ha iya balay nakaduhá upód in magkalainlain nga tawo; ha mga ikawaló hinkit'an ni Makaraig nga nagsisinuduysudoy han kalsada han hospital, harani han kombento ha Santa Clara, ha panahon nga nagdidinublason an mga ling- ganay didá han singbahán; ha mga ikasiyám hi Camaroncocido nakakita liwát ha iya didá ha haraní han teatro upód in usa nga bagá estudyante, nga sinmulód ha purtahan ngan ginmawás liwát ngan pamukawará dida han kasisidman han kakahuyan.
-Bagá sahó ko man!- binmalik pagsiring hi Camaroncocido; -ano in makukuha ko kun magpasabót ako han bungto?
Hi Basilio, sugad han siring ni Makaraig, waráy man liwát.
An makaluluoy nga estudyante, tikang umuli tikang ha San Diego paglukát kan Juli didto ha kauripon, binmalik pagbinasá han iya mga basahán, kauróg aadto ha ospital nagtitinuon o nagmamangno kan Kapitán Tiyago kay karuyag niya nga matambal an iya sakit.
An masakit dako nga arantuson; kun tinutulos, nag-iinaringasa tungód han kakulang han apyan nga gintatalinguha ni Basilio pagtikaibán, ginbubusaán hi Basilio, pinanunungboy, ginpapakaaluhan; hi Basilio nag-iilob hin waray aringasa kay maaram hiyá nga an iya binubuhat kaupayan hadton tawo nga nauutangan niya hin dako nga kaburut'on, didá hiyá tutugot kun kabilinggan na gud; natutumanan na ngani an mananáp han bisyo, hi Kapitán Tiyago nalilipay, nahumok an kasingkasing, nginangaranan hi Basilio nga iya anák, nagtutuók kay nahanunumdom han pagminangno ha iya han batan'on, han maupay nga pagpalakát han iya mga tuna ngan nahananabi nga iya hihimuon nga iya sumurunod; hi Basilio nahiyom hin mapait ngan naabat nga didá hiní nga kinabuhi an pagtugot han kasurusnan nga hilig ginbabalsan lugód hin maupay, diri an pagtuman han turumanon. Diri la nakapirá na hiya paghu-
