han mga magnipis nga barasahón nga aton na hinnabihan,
ngan diri pa binurublag an mga paypay.
-An putók han kasingkasing an tuman nga binabati... maluya iton purso... waray gana pagkaon,-nagsiríng hi Basilio nga hinmiyom hin masamdong ngan gutiay an tingog; -iginbibinalhas hin duro kun mga maagahon...
Ngan han pagkita nga hi Simoun ngadto pagsisiniplat han magnipisay nga barasahón ngan nahadlok nga bangin na man say ighinimangaraw ha iya an didto ha kagurangan nga ira ginhinimangraw, nagpadayon hi Basilio:
-Itón iya kalawasan luób na han lara han apyan; mga sano buwás ma-tigda la hin kamatáy bagá in lilintián... gutiay la in hipapasangilán, usa nga kalas mapatay ha iya...
-Sugad han Pilipinas!- nagmugó hin makababaraka hi Simoun.
Hi Basilio waray pakapugóng hin usa nga kilos, ngan tungod kay diri gud niya karuyag nga balikon an ira himangraw didto ha kagurangan, nagpadayon bagá sugad hin waráy la pakabatí han kan Simoun yakan:
-An nakakapaluya ha iya amo iton iya mga ngarat, mga kahadlok...
-Sugad han pamunuan!- binmalik pagyakán hi Simoun.
-May pirá na haní kagab-i nga nahamangno waráy sugá, nakasiring nga butá na hiyá; nag-inaringasa, nagpinamuyboy ngan ginbinusaan ako, nasiring nga ginkuhaan ko hiyá han matá... Han pagsudla ko nga may dará ko nga sugá nakasiring nga hi P. Irene ako ngan ginngaranan ako nga iya manunubos.
-Sugad gud han pamunuan, waray ibá!
-Kagab-i nagpadayon hi Basilio napakabungól la,- binmuhát nangaro han iya hinigutan, an iya manók nga may tuló na katuig nga namamatay, salit napirit ako hin pagduhól ha iya hin usa nga ugáng, ngan gindinayaw ako, ginsaaran ako hin damo kayukót nga...
Hadto nga uras usa nga urasán nagtuktok hin na- pulo may tungá nga takna.
Hi Simoun kinulba ngan ha usa nga kilos nagsawáy han batan'on.
-Basilio,- nagyakán hin hamubo nga tingog,-
