pamati hin maupay ngan ini nga mga dalikyat uraura
hin kahimurulsan. Na-kita ako nga waray mo buklará
ito nga mga barasahón nga akon ha imo iginpadará;
ikaw diri gud nahanunumdom magutiay hin para han
imo tuna...
An batan'on karuyag unta mamaribad.
-Kawang la!-nagpadayon hi Simoun hin mamará nga tingog. -Ha sakób hin usa kauras an karibók magtitikáng ha usa ko nga paghatag hin tigaman ngan buwás waray na pagtuón, waray na Universidad, waráy na iba kundi araway paragtayáy. Ginandam ko nga tanán ngan waray ruhaduha an akon pagdarag'an. Ngan magdaóg ngani kamí, an ngatanán nga angay unta ha amon makabulig kundi waray bumulig, pakakasidngon nga kaaway. Basilio, nakanhi ako ha imo pag-agda nga magpili ka, kun kamatayon imo, kun an imo kabubwason!
-Kamatayon ko, o kabubwason!-sinubád niya sugad hin waray igsasarabot.
- Kun aadto ka ha pamunuan o aadi ka ha amon,—nag-siring hi Simoun; -kun matampo ka han naglulupig ha imo o maugop ka han imo tuna. Pagpili kay waray na panahón! Napakanhi ako pagbawi ha imo ha kataragman tungód han hinumduman nga aton ginkakausahán nga duhá!
-Kun maugop han manlulupig o han akon tuna!-ginliliniwatliwat niya hin mahinay nga tingog. An batan'on nagugupong; nagkikinita kan Simoun an mga matá may kahadlok, inmabat nga nanhahagkot an iya mga kalawasan ngan kadam'an nga panhunahuna an nadangóp ha iya ulo; na-kita hiyá hin luób hin dugó nga kakalsadahan, nabati hin binutubutó, nahatatampo hiyá hin kamiminatyan ug mga samád, ngan kaurusahon nga gahóm han mga hilig! Na-kita hiya ha iya nga nakakasul-ot hiya hin panapton han operador ngan nangungutód hiyá hin mga til ngan nanlulukat hin mga bala.
-Aadi ha akon mga kamót an kaburut'on han pamunuan, nagpadayon hi Simoun; -ginamit ko ngan igintubyan ko an pipirahay niya nga kusóg ngan katigayunan ha mga linuróng nga mga espedisyon, kay ginipa ko han pulós nga makukuha; an iya mga punuan aadto yaná ha teatro waray kagupnganan ngan nagkakaliliáw ngan namamaglaom hin usa kagab-i nga kali-
