mabugho hin gutiay ngan, sugad han iya nababatasan,
nagpakita hin paghiubós.
Kundi gilayón ginhatagan ni Isagani hin kasayuran.
-Oo,―ginsiring,-hinigugma ko labí han ngatanán nga butang han waray ko pa ikaw hikikilal'i! Naruruyagan ko an paglayawlayaw didto han karupdupan, pagkaturog didto ha sirong han kakahuyan, paglingkod ha bawbaw hin usa nga kantil nga bato basi malantaw ko ha usa kapagsiplat an Pacifico nga ha akon atubangan nag-uukáy han iya tagumon nga mga balód nga nagdadará ha akon han aningal han mga awit nga iya ginadman didto han mga baybayon han talwas nga America.... Han diri ko pa ikaw kilala, adto nga dagat amo an akon kalibutan, an akon nabibihagan, an akon higugma, an akon mga paghingyap. Kun malinaw, nakaturog ngan an adlaw nagdidingga ha kahitaasan, say ko naiipahan an pagkinita han kahiladman, nga gintatamód ko ha may kakalim'an kameiros, nagpipinaniplat ako hin mga mananap nga magpa- kaharadlok didto han kagurangan han mga bagangbang ug mga bató nga isinisilhag han malinaw nga tagom, han dagko nga halas nga sugad han siring han mga mag-uruma, inmiwas didto ha kagurangan ngan magpakadto pagukóy ha dagat ngan magbalhin hin dagway basi maginmagpakaharadlok.... Kun mga kulóp, kay amo an siring nga ibinubutho han mga katáw, ginbabantayán ko pagkinita an tagsatagsa nga balód hin dako nga pag-ungara nga nakausá bagá hinkit'an ko didá ha butnga han mga burá nga nanhihimalangá han ira mga birilhon nga uyág; binati ko gud hin mahayag an ira mga awit, awit ha kagawasan, ngan pinaniiran ko an tunóg han ira magtagingting nga mga arpa. Hadto nahamamalangá ako hin tigmaiha nga mga uras ha pagkinita han pagkabarubalhin han kahimo han mga dampog, pagkinita hin puy-aw nga kahoy ha butnga han patag, usa nga bató, hin waray ko sinasabután kay anó, hin diri ko masayuran an turukibon nga pagbati nga ha akon nadangóp. Danay ako han akon batá paglaygayán hin haglaba nga wali, ngan tungód han iya kahadlok nga bangin dinuduktan ako hin sakit nga hipocondria ginhihimangrawán ako hin pakikadto ha mediko. Kundi hinkit'an ta ikaw, ngan ha imo ako nahagugma, ngan yaná, hiní nga bakasyones inmabat ako nga didto may kakulangan, an kagurangan masiróm, masubó an salóg nga nasuróp ha karupdupan, an dagát mauyám,
