huna tumipa han akon. Sugad han akon hinbatián,
namay-adá niyo panihapon kagab-i, ayaw pamaribad...
-Diri ako namamaribad.- tinapó ni Isagani.
-Labi nga maupay, tigaman ito nga natangdo ka han inabután han iyo mga buhat. Labot pa, maraot kun mag-alinggawas ka; diri ko ikaw binabasol, waray ha akon kun anó an iyo pinamagyinakan kagab-i didto; diri ta ikaw ginsasala, kay manta, makakahimo kamó pagyakán kontra han mga dominikos han ngatanán nga iyo karuyag, ikaw diri ka namon tinun'an; yaná la nga tuig na may namon katakós hin pagtutdo ha imo ngan bangin ngani diri ka na dinhi makagpadayon. Ayaw pakasiríng nga namumuyboy ako, diri; diri ako magkakarag hinín akon panahón hin sugad la hito nga mga kalinurungán. Iginpatawag ko ikaw kay nakahuna- huna ako nga usa ka hitón pipirá la nga mga estud- yantes nga may kalugaringon nga convicción ngan tungod kay naruruyag ako hin tawo nga convencido, nganakon, ha kan Sr. Isagani ako pakikipanginsayod.
Hi P. Fernández inmukóy ngan magpadayon han paglinakatlakat, natungok han ulo, nagkikinita han bugha.
-Makakahimo ka paglingkod kun karuyag mo,- nagsiríng; may batasan ko hin paglakatlakat hamtang ako nagyiyinakan kay sugad hitó, masayón, nagpa- pangulpot an mga panhunahuna.
Hi Isagani nagtinukdaw la, nadangág an ulo, nag- hihinulat nga an catedratico magtikáng paghimangraw mahatungód han asunto.
-Kapín na hin waló katuig nga ako katedratiko,- nagpadayon hi P. Fernández nagsisinuduysudoy, -ngan iginkakilala ako ug iginkahiruhimangraw in kapin hin duhá kayukót limá kagatós nga mga batan'on; gintut- duán ko hirá, gintalinguha ko nga manhibaró, iginpa- santop ko ha ira an mga kasayuran han pagkamatadong, han dungóg, kundi yaná nga mga panahon nga duro inín ngurudo kontra ha amon, waray ako makakitá hin usa nga magpasipara pagluwás, pag-ako han iya mga sumbong kun aadá ha atubangan hin kadam'an... May mga batan'on nga ha amon talikurán naglilinibak ha amon kundi ha atubangan naharók han amon kamót ngan nahiyom pakilimós han amon siplat! Puf! Puf! Ano in karuyag mo nga bubuhaton namon han sugad nga mga sapat?
