ngan tiunano nga kahimtang nga an paghibaró nga nakakarawat
nasulód ha kadarayawan, nauyon ako ha imo
nga kami may mga karat'an. Hino an may sayóp hito?
Kamó nga may tuló na kasiglo may tungá, nga aadá
ha iyo mga kamót an pagtutdo ha amon, o kami nga
arualagad bisan paunanhon? Kun ha kahagos hin tuló
kasiglo may tungá an eskultor, waray nahimo kundi
usa la nga pataraw'an nga dagway, katahapan nga
lurong.
-O maraot nga uraura an masa nga iya ginagamit
-Labi na hin kalurong kay maaram na hiyá nga maraot, diri binabayaan ito nga masa ngan nagpapadayon la pagkinarág han panahon... Ngan diri la kay lurong, malimbong pa ngan matikas kay maaram na hiyá han kawaray data han iya buhat, iginpapadayon la basi kumarawat han suhol. ngan diri la kay lurong, ngan matikas, banyaga pa liwát kay nadiri nga an ibá sumari pagpakita han iya mahihimo man-gad pa may mahitsura nga himurulsan! Pangarít, nga diri sukól, han waray sarabutan.
Adto nga batón malapirít! ngan hi P. Fernández sinmabót nga hindakpan hiyá. Sinmiplat kan Isagani ngan pinakasiring niya nga bagá an higante, dimalupigan, mapiriton, ngan yaná ha siyahan nga paghinabó ha iya kinabuhi linulupigan hiya hin usa nga estudyante nga pilipino. Nagbasol hiya nga iya inayat hin pakiglantugi, kundi pag-aanhon pa. Didá han iya kagupong ngan tungód han paghiatubang niya hin makaharadlok nga kaaway, namilíng hin maupay nga kalasag ngan say ginamit an gobyerno.
-Kamó, iyo iginsasala ha amon an ngatanán nga kakurian kay waray niyo hinkikit'an nga ibá kundi kamí kay amo an nahararaní, nagsiring hin tingog nga diri na malabyaw; -kaiyá, diri urusahon! An bungto nasisina han sundalo o han agwasil nga amo an nagpirma han sugo pagpadakóp. Hi kamó ngan hi kamí nasayaw hin uusá la nga kumpas han musiká; nabiksal kamó han til sugad ha amon, ayaw kami pagsayupa; an musiká amo an nagsusugo han aton mga kiwá. An iyo hunahuna nga kami an mga prayle waray namon kasingkasing ngan nadiri kami han kaupayan? An iyo hunahuna nga diri kami nagdudumdom ha iyo, nga diri kami nagdudumdom han amon mga turumanon,
