han pakabati nga may nagtitikaharani nga badukbadok.
Matuod man gud, may mga pitad nga namamagtidaop, ngan ngatanan didto ha plateriya nanhipaukoy.
—Hi San Pascual Bailon bantugan nga santos,— nagsiring an patootoo nga platero hin dako nga tingog, nagkikiniro ngadto han iba; —hi San Pascual Bailon...
Hadto ngahaw sinmumaw an bayhon ni Placido Penitente kaupod an parapanhimo hin pabuto nga aton na hinkit’an nga gintitinugon ni Simoun. Ngatanan namag-alirong han pagkakaabot pa la pamakiana kun ano an mga bag-o nga hinabo.
—Waray ako makahimo pakaghimangraw han mga preso,— binmaton hi Placido. —May ada nira mga katluan!
—Managbantay kamo!— nagsiring an parapanhimo hin luthang nga nakigsiplatay kan Placido hin may ginkakasabutan; —nasiring nga yana nga gab-i may pamatay....
—Ha? Panulay!— nakasiring hi Chichoy naniplat pamiling hin hinganiban, kay waray man may hinkit’an nga bisan la ano, say pinurot an iya tayhop.
An maestro linmingkod; ikinukurog an mga tuhod. An sumatan nakakahunahuna nga ginpapatay na hiya ngan nagtangis na la ngadaan tungod han magiginkapalaran han iya mga suludbalay.
—Ah!— nagsiring an eskribyente; —waray pamatay yana nga gab-i! An manaragdon hini,— ngan nagsinyas hin patiriguhon, —maupay na la kay masakit.
—Hi Simoun!
—Ehem, ehem, ehhem!
Hi Placido ngan han parapanhimo hin luthang naggisiplatay liwat.
—Kun waray ito kasakit....
—Naghihimohimo hin usa nga rebolusyon,— nagsiring hin pasibaya an parapabuto nga nagparukot hin sigarilyo dida ha bawbaw han tubo han kingke; —ngan ano daw hadto an aton binuhat?
—Ada, tuudtuuron na la lugod, kay kun panmamatayon na man la kita....
An pag-inubo hin waray sukol amo an hinungdan nga diri paghibatii han katapusan nga bahin han himangraw. Tingali makalilisang an ginyinakan ni Chichoy kay nagbarabad han iya tayhop hin kanin may
