yagpayag nga inuukyan han makaluluoy nga Juli ngan
han iya apóy, an daraga nagkinahanglan nga balikon ha
iya pagsumát makaduhá. Nagkinita kan Hermana Bali
nga amo an nagsisinumat, sugad hin waray kasasayod,
waray hiyá pakakagsurusumpay han mga pamurubuot;
nanhuni in gangis ha iya mga talinga, binmati hiya hin
kaipít han iya kasingkasing ngan namay-adá niya panag-
hap nga adto nga hinabó tingali makabungkag han iya ka-
bubwason. Kundi hinmawid ha iya in gutiay nga pag-
laom, nahapahiyóm, pinakasiring nga durugas la ha iya
ni Hermana Bali nga, bisan la uraura kamabug-at, iya
iginpapasaylo basta magsiring nga durugas; kundi hi Hermana Bali nagkudós han iya tamuragko ngan han talintuturo ngan hadkan pagpakilala nga nagsusumát gud hiyá
han kamatuuran. Didá hini an kalipay nawará dida han
mga im-im han daraga, iginpurud-as hiyá hin makalilisang, nanluya ngan ha siyahan pa la ha bug-os nga kinabuhi, nawad'an hiyá hin kalibutan.
Unina han katapos hin mga lagpak, kulitog, wigtik hin tubig, pagpaharók hin kudós ngan haplas hin palma bendidta nga tinubod, an daraga hinmagutaw'an ngan nangalimayhaw, an mga luha nanmarisbis hin hilom ha iya mga matá hin tinag-usa katuró, waray pagharóy, waray bikho, waray ngurutob! Nagpipinanhunahuná hiyá kan Basilio nga waray iba nga nag-agak kundi amo la hi Kapitan Tiyago ngan, unina han iní patáy na, waray na gud niya tinatapuran ngan waray katalwasan. Ha Pilipinas daan na sinasabót nga kinahanglan gud in padrino, tikang ha pagbunyag ngadá han kamatáy, ha bisan la anó nga talinguha, ha pagbawi han katadungan, ha pag-aro hin pasaporte o pagbukás hin usa nga pamuruhatan nga bisan la anó. Ngan ginhihiruhimangraw nga adto nga kabilanggo ni Basilio dará hin mga kadurumton tungód ha iya ngan hi iya tatay. An kabiduan han batan'on nasangpot ha kawaray paglauman. Yaná iya na man tungod an pagtalwas ha iya, sugad han binuhat man hadto han paglukatá ha iya didá ha kauripon, ngan ha sakób han iya panhunahuna may uusá nga tingog nga nagsasagdon nga may iya buhaton ngan ha iya nanlaladawan in usa nga pitád nga makarimadima.
-Hi P. Camorra, an padi!-nasiring an tingog.
Hi Julí na-kagát han mga im-im ngan nahapapaukóy ha kasisidman han panhunahuna.
