Tungód han pakamatay ni iya tatay ginpreso hi iya apoy kay ginlauman nga bangin didá hadto umulpot an anák. An nakahatag la hin kagawasan han lagás amo hi P. Camorra, ngan hi P. Camorra maraot an kahimó nga ginpapasalamatan la ngan nagluwás gud han kabatasanan nga kawaray pagtabon han pulong, nangaro ha iya nga magsakrispisyo.... Tikang hadto hi Juli naghinirot nga igkakita han padi, kundi iní napaharók han kamót, pinipidlit an iya iróng, an iya bayhon, nag-intrimís ha iya hin mga kiró ngan dayon ha iya kukutla ngan magtinawa nga magtinawa. Hi Julí amo an tinikangan nga iní nga
buutan nga padi magtubal hin pirá nga batan'on nga namamagsinudóy han baryo pagpinanharaná han kadara-gan'an. An magraot in baba kun nagpapakakitá ha iya nga nalabay, tamod an ulo, waray tawatawa, namamagyakán basi hiya makabatí:
-Kun talinguhaon niya, hi Ginhaupan Tales maiindultuhán.
An batan'on nasangpot ha ira balay mabiduon ngan waray tultol an mga paniplat.
Dako an binalhinán ni Julí; nawad'an hin kalipay, waray na may nakakitá ha iya nga humiyom, an tuman nga nagpapanyakanyakán ngan ngani patí may kahadlok hin pagpakita han kahimó. Usa kaadlaw hinkit'an didto ha bungto nga may dako nga dum-it hin uring ha agtang, hiya nga unob himiste ngan hingayad. Nakausá pinmakiana kan Hermana Bali kun itón namamag-unay nanhihingadto ba ha impyerno.
-Kaiyá daw la!-binmatón an babayi ngan ginsinumatan kun tiunano didto an mga kamutangan bagá sugad hin tikang na hiyá didto.
Tungód han kapreso ni Basilio an mga kablasanon ngan magbinaluson niya nga kaurupdan nagkasarabot hin pagbuhat han ngatanán nga sadáng mahimo makagawás la an batan'on; kundi tungód kay didá ha ira ngatanán waray gud katitirok in pirá kapisos, hi Hermana Balí gihapon an nakaagi hin katigayunan.
-An angay ta buhaton amo an pangaro hin sagdon ha eskribyente,-nagsiring.
An hunahuna hadto nga mga ubós la nga mga tawo nga an eskribyente han hukmanan amo an oraculo ha Delfos han una nga mga griyegos.
-Kun tagan mo hin sikapat ngan hin usa nga taba-
